Fjármálaráðstefna Sambands íslenskra sveitarfélaga hófst í gær. Í máli Sigurðar Á. Snævars, sviðstjóra hag- og upplýsingasviðs sambandsins, kom fram að árið í ár verður ekki skárra en síðasta ár hvað varðar fjármál sveitarfélaganna. Hann sagði að hratt vaxandi launakostnaður væri ein helsta ógnin hvað varðar fjármál sveitarfélaga. Hann sagði einnig að niðurstöður rannsóknar Analytica á fjárhagslegri sjálfbærni sveitarfélaga séu skýrar, sveitarfélög sem eru með mikil útgjöld vegna þjónustu við fatlaða séu varla fjárhagslega sjálfbær. Það þurfi aukið fjármagn frá ríkinu.

Morgunblaðið skýrir frá þessu. Fram kemur að Sigurður hafi sagt að vaxandi launakostnaður sé helsta ógnin við fjármála sveitarfélaga og ef horft væri á þróunina frá 2019 þar til á þessu ári sjáist að afkoman hafi versnað hratt hvort sem litið er til rekstrarafgangs sveitarfélaga eða veltufjár. „Launakostnaðurinn hefur einfaldlega étið upp allar útsvarstekjurnar og þróunin hefur verið í eina átt í töluverðan tíma. Ef breytingum lífeyrisskuldbindinga er svo bætt við þá skiluðu útsvarstekjur í fyrra engu upp í önnur útgjöld. Það er auðvitað mjög alvarlegt og er meginstefið í þróun fjármálanna í fyrra og hitteðfyrra og sýnist mér aldeilis líka í ár,“ sagði hann.

Aldís Hafsteinsdóttir, formaður stjórnar sambandsins, ræddi launakostnað sveitarfélaganna í setningarræðu sinni. Hún sagði að mörg sveitarfélög standi vel en hjá sumum sé staðan slæm. „Á árinu 2021 benda líkur til að fjárhagsstaða sveitarfélaga versni frá fyrra ári, m.a. vegna aukinna launaútgjalda sem virðast vera langt umfram tekjuaukningu vegna útsvars,“ sagði hún.

Hún sagði að hið opinbera eigi ekki að vera leiðandi í launaþróun, almenni markaðurinn eigi að draga vagninn. Það séu takmörk fyrir hvað launakostnaður geti vaxið mikið án þess að stórslys verði.