Lenya Rún Taha Karim, frambjóðandi á 3. lista Pírata í Reykjavík norður, skilaði inn kæru til kjörbréfanefndar í dag. Ástæðan fyrir kærunni er hin umtalaða talning á atkvæðum í Norðvesturkjördæmi. Lenya fer fram á að ef ekki verði gerð uppkosning eða endurkosning þá muni fyrri talningin gilda en samkvæmt þeirri talningu var Lenya með sæti á Alþingi.

„Skilaði inn kæru til kjörbréfanefndar rétt áðan – ef að það verður ekki uppkosning eða endurkosning á landsvísu er lágmark að fyrri, óspilltari talningin gildi. Er þetta ekki annars það sem að allir svölu krakkarnir eru að gera?“ skrifar Lenya í færslu sem hún birti á Twitter-síðu sinni í dag.

Eftir að hafa birt færsluna sendi Lenya tilkynningu sem send var á fjölmiðla. Í tilkynningunni kemur meðal annars fram hvert innihald kærunnar er.

„Í kærunni segir að ágallar á endurtalningu atkvæða, sem raktir hafa verið í fjölmiðlum og formaður yfirkjörstjórnarinnar hefur gengist við, séu slíkir að ekki sé unnt að styðjast við endurtalninguna. Boðað var til endurtalningarinnar með ólöglegum hætti og endurtöldu kjörgögnin voru bersýnilega spillt vegna ófullnægjandi frágangs og meðferðar. Í kærunni er þess því krafist að stuðst verði við lokaniðurstöður talningar sem yfirkjörstjórn í Norðvesturkjördæmi tilkynnti að morgni sunnudagsins 26. september.

Með kærunni er lögð sú krafa á kjörbréfanefnd Alþingis að hún taki afstöðu til lögmætis endurtalningarinnar sjálfrar, fari svo að nefndin ákveði hvorki að ráðast í uppkosningu í kjördæminu eða endurkosningu á landsvísu. Fari svo sé aðeins einn raunhæfur og löglegur kostur í stöðunni: Að styðjast við fyrri talningu atkvæða sem kjörstjórn og eftirlitsmenn töldu löglega að morgni 26. september.“

Lenya er ekki fyrsti frambjóðandinn sem skilar inn kæru til nefndarinnar en til að mynda hafa þau Rósa Björk Brynjólfsdóttir, frambjóðandi Samfylkingarinnar í Reykjavík suður, og flokksbróðir Lenyu, Magnús Davíð Norðdahl, oddviti Pírata í Norðvesturkjördæmi, gert það líka.

Þá hefur Karl Gauti Hjaltason, þingmaður Miðflokksins, kært niðurstöðurnar til lögreglu en Karl missti sæti sitt við endurtalninguna líkt og Lenya.