Nú þegar þingkosningum er lokið, eða næstum því lokið þökk sé Inga Tryggvasyni, þá er áhugafólk um pólitík farið að beina sjónum sínum að sveitastjórnarkosningum næsta árs. Þar gæti dregið til tíðinda á mörgum vígstöðvum en þó sérstaklega í höfuðborginni.
Sá orðrómur gengur nú fjöllum hærra að Dagur B. Eggertsson, borgarstjóri, muni halda á ný mið og stíga til hliðar. Það er að minnsta kosti ekkert launungarmál að Dagur hefur legið undir feldi undanfarið. Samkvæmt heimildum Orðsins hefur hann rætt það innan raða Samfylkingarinnar að hann muni tilkynna um ákvörðun sína eftir þingkosningar og telja eyrnahvíslarar að brotthvarf sé yfirvofandi.
Þó að vinir einkabílsins séu þessum fullyrðingum ekki sammála þá hefur Dagur átt afar farsælan feril í borgarstjórn sem að spannar næstum tvo áratugi. Eftir þriggja mánaða prufukeyrslu sem borgarstjóri frá október 2007 til janúar 2008 varð Dagur loks borgarstjóri árið 2014 og hefur setið á valdastóli síðan.
Óhætt er að fullyrða að Dagur hafi fylgt eigin sannfæringu og pólitískra samherja sinna. Hann hefur keyrt umdeild stefnumál áfram, eins og um þéttingu byggðar, nýja sýn á samgöngur og breyttar áherslur í miðbænum, af festu og ekki veigrað sér við að taka óvinsælar ákvarðanir í þeim efnum.
Það hefur gert það að verkum að fjölmargir einstaklingar sjá rautt þegar minnst er á Dag. Óvenju margir þeirra eru með réttindi til að keyra leigubíl eða hlusta mikið á Útvarp Sögu.
Sagan mun væntanlega dæma hvernig til hefur tekist með stefnuna en ljóst er að Dagur hefur sýnt mikinn kjark.
Þá hefur hann staðið af sér ýmis mál sem að hefðu getað reynst banabiti léttvægari stjórnmálamanna. Nægir þar að nefna umræður um braggann fræga, Hlemm Mathöll, myglaðan Fossvogsskóla og þá óheppilegu staðreynd að dýrasta torg borgarinnar er anddyrið að heimili borgarstjóra.
Ef af verður þá er ljóst að ærið verkefni er framundan hjá Samfylkingunni að leita að eftirmanni sem getur fetað í fótspor Dags. B. Eggertssonar.