„Getur þessi maður ekki varið tíma sínum og Alþingis í eitthvað sem skiptir þjóðina máli? Bara dellur eins og að fá yfirlit yfir óskráðar venjur og svo framvegis?“
Að þessu spyr verkfræðingurinn Halldór Jónsson í pistli sem hann birti á bloggsíðu sinni í dag. Maðurinn sem Halldór skrifar um er Björn Leví Gunnarsson, þingmaður Pírata. Halldór virðist ekki vera sáttur með orð Björns um þingsályktunartillöguna sem snýr að því að fleiri en tveir geti skráð sig í sambúð.
Björn, sem er fyrsti flutningsmaður tillögunnar, sagði að samfélagið væri búið að taka miklum breytingum á síðustu áratugum og að lögin þurfi að endurspegla það. Í hjúskaparlögum eru nú skilyrði um að hjúskapur sé á milli tveggja einstaklinga, óháð kyni. „Þá spyr maður sig sjálfkrafa, af hverju ekki þrír? Af hverju ekki fleiri? Af hverju mega fjórir ekki ættleiða barn til dæmis? Eða systkini sem kaupa saman íbúð? Af hverju mega þau ekki skrá sig í sambúð og fá þau réttindi sem fylgja því?“ spurði Björn.
„Nokkrir vinir mínir voru að leigja saman stóra íbúð fyrir nokkrum árum og vandamálið þar var að einn þeirra bar ábyrgð á leigusamningnum gagnvart hinum sem voru réttlausir. Það býr til alls konar vandamál varðandi húsaleigubætur og svoleiðis. Þannig að það eru núna fjöldatakmörk sem þurfa ekki að eiga við,“ sagði Björn enn fremur um málið.
Halldór er langt frá því að vera sáttur með Björn og veltir því fyrir sér hvar þetta endar. „Af hverju má Knattspyrnufélagið Valur til dæmis ekki ættleiða börn í þeim tilgangi að ala upp fótboltafólk framtíðar?“ spyr Halldór. „Hvar var þessi Björn Leví alinn upp og komu margir að því verki? Af hverju lætur þessi maður alltaf svona?“