Glúmur Baldvinsson, oddviti Frjálslynda lýðræðisflokksins í Reykjavík, vill meiri endurnýjun á vissum sviðum kerfisins, hjá embættismönnum og ýmsum öðrum starfsmönnum ríkisstofnana. Hann leggur til að enginn slíkur aðili sé lengur í sama starfinu en sex ár. Minnist Glúmur ferils síns hjá EFTA þar sem sú regla gilti að ráðningarsamningur var til þriggja ára með möguleika á framlengingu til annarra þriggja ára, en ekki meira.

Glúmur segir að hann telji þessa reglu vera skynsamlega og hún ætti að gilda víða:

„Eftir að ég lauk námi um þrítugt hóf ég störf hjá Fríverslunarsamtökum Evrópu eða EFTA einsog þau kallast í daglegu tali. Fyrst í Genf og síðar Brussel. Þar gilti sú regla að ráðningarsamingur var til þriggja ára með möguleika á framlengingu til þriggja ára. Og thats it. Ekki var hægt að framlengja eftir það. Þetta þykir mér skynsamleg regla sem ætti að gilda í öllu embættismannakerfinu hér og ríkisstofnunum einsog RUV.

Af hverju er þetta sniðugt fyrir báða aðila? Jú til að koma í veg fyrir að fólki fari að líða einsog það eigi pleisið og verði einfaldlega áskrifendur að launum sínum um aldur og ævi. Eða er það vilji þjóðarinnar að sömu einstaklingar stýri sömu þáttum framá grafarbakkann. Eigum við t.d. öll að eldast með Gísla Marteini og Agli Helga ofl í heila öld án endurnýjunnar. Grána og deyja saman? Það er hæfileikaríkt fólk þarna úti lofa ég ykkur. Gefum því sjens og leyfum stofnunum ríkis að ganga í endurnýjun lífdaga með reglulegu millibili. Ella staðnar allt og deyr með hugarþelinu: ég á þetta og ræð þessu og má þetta.“