„Ég man ekki eftir því að frambjóðandi sem hlaut ekki brautargengi í prófkjöri hafi farið í prófkjör fyrir sama flokk í öðru kjördæmi fyrir sömu kosningar,“ segir Ólafur Þ. Harðarson, prófessur í stjórnmálafræði við Háskóla Íslands.
Sem kunnugt er sóttist Kolbeinn Óttarsson Proppé, þingmaður Vinstri grænna, eftir oddvitasæti í forvali flokksins í Suðurkjördæmi en hafnaði í fjórða sæti. Kolbeinn hefur nú ákveðið að söðla um og sækjast eftir sæti á lista í öðru hvoru Reykjavíkurkjördæmanna. Fyrir síðustu kosningar skipaði hann annað sæti flokksins í Reykjavík suður en taldi farsælla að gefa kost á sér í Suðurkjördæmi, þar til niðurstöðurnar komu í hús.
Ólafur bendir hins vegar á að dæmi séu um að menn hafi skipt um flokk „eftir slika útreið“ og rifjar upp þegar Jón Bjarnason lenti í þriðja sæti í prófkjöri Samfylkingar í Norðurlandi vestra árið 1999. „Hann tók ekki það sæti heldur efsta sætið hjá VG í sama kjördæmi – og náði kjöri á þing,“ segir Ólafur.
Spurður hvort Kolbeinn komi ekki laskaðuri inn í baráttuna í Reykjavík þegar hann er nýbúinn að lúta í lægra haldi innan flokksins í öðru kjördæmi segist Ólafur ekki sannfærður. „Ég er ekki viss um að Kolbeinn gjaldi þess í forvali í Reykjavík að hafa reynt að ná oddvitasæti í Suðurkjördæmi. Í Reykjavík reynir hann að ná 3.-4. sæti, sem gefur 2. sæti á öðrum hvorum Reykjavíkurlistanum. Kolbeinn hefur verið áberandi og öflugur þingmaður og á sér öflugan stuðning meðal margra frammámanna VG í Reykjavík.“
Tólf eru í framboði í forvali Vinstri grænna í Reykjavík sem verður dagana 16. til 19. maí. Í forvalinu verður kosið í efstu fjögur sætin framboðslistum Vinstri grænna til Alþingis í Reykjavíkurkjördæmum Suður og Norður. Frambjóðendur bjóða sig því fram tiltekið sæti í öðru hvoru kjördæmanna.
Frambjóðendur í Reykjavíkurkjördæmunum í forvali VG:
Andrés Skúlason, verkefnastjóri, í 2. sæti.
Brynhildur Björnsdóttir, blaðamaður, bókarýnir og söngkona, í 4. sæti.
Daníel E. Arnarson, framkvæmdastjóri Samtakanna ’78, í 2. sæti.
Elva Hrönn Hjartardóttir, sérfræðingur hjá VR, í 2. sæti.
Eva Dögg Davíðsdóttir, doktorsnemi í umhverfis- og þróunarfræði, í 3.-4. sæti.
Guy Conan Stewart, kennari, í 4. sæti.
Katrín Jakobsdóttir, forsætisráðherra, í 1. sæti.
Kolbeinn Óttarsson Proppé, alþingismaður, í 2. sæti.
Orri Páll Jóhannsson, aðstoðarmaður umhverfis- og auðlindaráðherra og varaþingmaður, í 2. sæti.
René Biasone, sérfræðingur hjá Umhverfisstofnun, í 4. sæti.
Steinunn Þóra Árnadóttir, alþingismaður, í 2. sæti.
Svandís Svavarsdóttir, heilbrigðisráðherra, í 1. sæti.
