Ásakanirnar voru settar fram í opinni Facebook færslu síðla dags í gær. Þegar þetta er skrifað hafa rúmlega 300 manns brugðist við færslunni, 90 tjáð sig undir henni auk þess sem henni hefur verið deilt rúmlega hundrað sinnum.
Færslan er svo hljóðandi:
Hún var beðin um að mæta í vinnu að kvöldi til því það væri svo mikið að gera og ekkert óeðlilegt við það. Hann var mættur, eftir á var það öðruvísi. Eftir smá stund sagði hann henni að að hann þyrfti að sýna henni eitthvað á efri hæðinni á vinnustaðnum.
Hún hlýddi því og hugsaði hvað er þarna uppi, þar króaði hann hana af og reyndi að kyssa hana, hún sterk og í góðu formi þannig að henni tókst að sleppa frá honum, hann náði henni aftur, hún bað hann um að hætta og sagði „þú átt konu og börn og ég á kærasta“ hann hvíslaði í eyrað á henni „það þarf engin að frétta þetta“ því miður tókst honum að káfa á henni og troða tungunni upp í hana, honum tókst ekki að ganga alla leið en það var ekki honum að þakka.
Nei þetta var ekki á útihátíð, þetta var á vinnustað
Nei það var ekkert áfengi… þetta er hrein siðblinda.
Þessi maður er í framboði fyrir Sjálfstæðisflokkinn….
Ef þér finnst þetta skipta máli og vilt fá frekari upplýsingar þá erum við öll hér tilbúin að gefa ykkur þær.
Færslan er skrifuð skömmu eftir að listi yfir frambjóðendur í prófkjöri flokksins í Suðurkjördæmi var kynntur. Í framboði eru níu einstaklingar, sex karlar og þrjár konur.
Miklar vangaveltur eru svo undir færslunni um hvern sé rætt. „Það á bara að segja hver þetta er,“ skrifar einn. „Auðvitað á að segja frá því hver þetta er. Á fólk svo bara að kjósa hann,“ spyr annar. Guðfinnur Sigurvinsson, starfsmaður þingflokks Sjálfstæðismanna tjáir sig jafnframt undir færslunni:
Það hefur ekki verið gengið frá neinum framboðslistum fyrir Sjálfstæðisflokkinn þannig að viðkomandi er ekki í framboði fyrir flokkinn fyrr en það hefur verið gert. Sennilega er viðkomandi að sækjast eftir stuðningi í prófkjöri sem er allt annað og með þessum pósti er verið að fella alla karlmenn sem taka þátt í prófkjörum flokksins vítt og breitt um landið undir grun og það finnst mér afar ámælisvert í ljósi þess hversu alvarleg ásökunin er. Eðlilegast væri að kæra þetta til lögreglu og láta viðkomandi svara fyrir sig þar en að draga fjölda saklausra manna inn í þetta mál á samfélagsmiðlum eins og hér er gert með hálfkveðinni vísu.
Samkvæmt upplýsingum DV hefur maðurinn í dag sett sig í samband við þá sem einnig gefa kost á sér á lista Sjálfstæðisflokksins í Suðurkjördæmi. Herma heimildirnar að maðurinn vísi þar öllum ásökununum á bug. Hann hefur þó enn ekkert gefið upp um hvort hann ætli að draga framboð sitt til baka.
Uppfært 17:00:
Margeir Vilhjálmsson hefur nú birt neðangreinda færslu á Facebook síðu framboðs síns. Þar segir hann sakirnar upplognar og hvetur þá sem trúir þeim til þess að kjósa einhverja aðra. Þar segir meðal annars:
Ásakanir sem fram koma í stöðuppfærslunni á facebook eru fjarri öllu sanni en hafa verið fastur hluti af lífi mínu frá árinu 2013. Þrátt fyrir umleitanir mínar og samtal við konuna sem lauk að því best ég vissi í góðri sátt fyrir 8 árum síðan, hefur hún fundið sig knúna til að tjá sig reglulega um málið undir rós á samfélagsmiðlum. Framsetning málsins í gær er einkar ósmekkleg þar sem allir karlkyns frambjóðendur Sjálfstæðisflokksins eru settir undir sömu sök.
Færsluna í heild sinni má sjá hér að neðan.
https://www.facebook.com/permalink.php?story_fbid=110497944484428&id=108432414690981
