Inga segir að Tómas Tómasson, veitingamaður sem oftast er kenndur við Búlluna eða Tommaborgara, sé á leiðinni um borð til þeirra. „Tómas er afar reyndur, bæði úr atvinnulífinu sem og lífsins skóla,“ segir Inga.
„Við verðum að fara að gæta betur að þeirri auðlegð sem býr í eldra fólki. Það að hafa lifað, öðlast reynslu gegnum súrt og sætt, glímt við áskoranir, komist frá þeim og haft sigur er ómetanlegt. Fólk með slíka reynslu á fullt erindi í stjórnmál. Stjórnmál eiga fyrst og fremst að snúast um líf okkar allra í samfélaginu. Samfélagið erum við, fólkið sjálft, við öll sem eitt.“
Tommi á Búllunni hefur ekki verið hræddur við að láta heyra í sér vegna stjórnmála. Tommi hefur nýlega gagnrýnt til dæmis Guðmund Franklín þegar sá síðarnefndi var í framboði til forseta Íslands. „Skil ekki alveg hvað Guðmundur er að fara með þessu framboði sínu. Það hefur aldrei gerst að sitjandi forseti tapi kosningu. En hann hefur lagt sig allan fram og komið með nógu marga meðmælendur til að uppfylla skilyrðin til að vera kjörgengur,“ sagði Tommi um árið og lagði til að Guðmundi yrði borgað fyrir að sleppa við framboðið, svo þjóðin gæti sparað þær 400 milljónir sem kosningarnar kostuðu.
„Ef ekki að þá verði honum boðnar kr. 145.000.000, sem er ein milljón Bandaríkjadollara, gjaldmiðill sem hann þekkir, og hann beðinn um að hætta við. Þá sparar þjóðin samt kr. 265.000.000. Gerði hann það fengi hann lítið prik.“
