Starfsfólk Nýsköpunarmiðstöðvar Íslands hefur sent opið bréf til nýsköpunarráðherra þar sem skorað er á hana að endurskoða áform um að loka Nýsköpunarmiðstöð um áramótin. Starfsfólkið leggur þess í stað til að starfsemi Nýsköpunarmiðstöðvar verði tekin til heildarendurskoðunar og nauðsynlegar breytingar gerðar. „Við starfsmenn erum tilbúnir í það samráðsferli,“ segir í bréfinu.
Þórdís Kolbrún Reykfjörð Gylfadóttir, ferðamála-, iðnaðar- og nýsköpunarráðherra, kom á fund með starfsfólki miðstöðvarinnar þann 10. september.
„Fundurinn var á margan hátt ágætur en staðfesti áhyggjur okkar að áform um að leggja niður Nýsköpunarmiðstöð séu ekki byggðar á mikilli greiningarvinnu, þvert á það sem þú hefur talað um, og eru einnig án samráðs við mikilvæga hagsmunahópa. Þannig virðist t.d. ekki búið að verðmeta hvaða áhrif áformin hafa á nýsköpunarumhverfið og samfélagið m.v. óbreytta stöðu annars vegar og með því að leggja miðstöðina niður hins vegar,“ segir í opnu bréfi starfsfólksins.
Vakin er athygli á því að ráðuneytið hafi tilkynnt að með þessum breytingum lækki breytingum lækki framlög ríkisins til þeirrar starfsemi sem Nýsköpunarmiðstöð sinnir úr 700 milljónum á ári í 350 milljónir.
„Það er því alveg ljóst að með þessari aðgerð er verið að draga úr stuðningi við nýsköpun á landinu öllu, á landsbyggðinni og höfuðborgarsvæðinu, en ekki efla hana eins og ráðuneytið heldur fram. Þetta er líka skoðun margra í sprotaumhverfinu og sérstaklega alvarlegt þegar einmitt hið gagnstæða ætti að gera.“
Í bréfinu eru nefndar nokkrar ástæður sem mæla gegn því að loka Nýsköpunarmiðstöð. Ein þeirra er staðan í samfélaginu vegna COVID-19.
„Á þessum sérstöku covid tímum sem minna efnahagslega og samfélagslega um margt á kreppuna 2008, en með mun meira afleiddu atvinnuleysi, þá er mjög mikilvægt að efla nýsköpunarþjónustu í landinu. Í kjölfar kreppunnar 2008 átti Nýsköpunarmiðstöð stóran þátt í að koma hjólum atvinnulífsins aftur af stað með því að aðstoða atvinnulausa frumkvöðla og fékk mikið lof fyrir víða í samfélaginu og einnig frá ráðuneytinu,“ segir starfsfólkið í bréfinu.
Bréfið má lesa hér í heild sinni:
Opið bréf til nýsköpunarráðherra. Ósk um endurskoðun á fyrirætlunum um lokun Nýsköpunarmiðstöðvar