Niðurstöður þjóðhagsreikninga áætla á landsframleiðsla á Íslandi hafi dregist saman um rúmlega níu prósent á öðrum ársfjórðungi 2020 samanborið við sama tímabil í fyrra. Þetta er mesti samdráttur sem hefur mælst síðan ársfjórðungslega mælingar hófust hér á landi.
Má í þessum niðurstöðum merkja áhrif af heimsfaraldri Covid-19 og þeirra aðgerða sem gripið var til í þeim tilgangi að sporna gegn útbreiðslu hans hér á landi sem og á heimsvísu.
Í tilkynningu Hagstofu Íslands segir:
„Takmarkanir á ferðalögum fólks á milli landa höfðu veruleg áhrif á bæði inn- og útflutning þjónustu á tímabilinu en í niðurstöðunum gætir einnig fjölþættra áhrifa samkomubanns á eftirspurn eftir vöru og þjónustu af ýmsu tagi hér á landi. Samkvæmt mælingum á vinnumagni, sem öllu jöfnu gefa sterka vísbendingu um framleitt magn vöru og þjónustu til endanlegra nota, dróst heildarfjöldi vinnustunda saman um 11,3% prósent á tímabilinu.“
Samdráttur var í þjóðarútgjöldum – samtala neyslu og fjárfestinga, og nam samdráttur rúmum 7 prósentum. Samdráttur í einkaneyslu mældist rúm átta prósent. Fjármunamyndun dróst saman um tæp 19 prósent.
Ekki var þó samdráttur í allri einkaneyslu. Til að mynda benda niðurstöður til aukinnar neyslu lyfja og annarra lækningavara, rafrænni þjónustu og áfengi.
Einnig var samdráttur í bæði inn- og útflutningi. Útflutningur dróst saman um tæp fjörutíu prósent en innflutningur um tæp 35 prósent.
Samdráttur hefur átt sér stað víðar í heiminum. Sérstaklega í ríkjum sem hafa lent illa í heimsfaraldrinum.
„Þannig mældist samdrátturinn innan Evrópusambandsins í heild 11,7% að raungildi á 2. ársfjórðungi miðað við fyrri fjórðung. 20,4% í Bretlandi, 18,5% á Spáni og 13,8% í Frakklandi.“
Um er að ræða bráðabirgðaniðurstöður sem hagstofur viðkomandi ríkja hafa birt á undanförnum vikum og eru settar fram með fyrirvara um aukna óvissu í niðurstöðum.