Íris Róbertsdóttir, bæjarstjóri Vestmannaeyja, segir íbúa Vestmannaeyja taka hópsmiti sem þar nýlega greindist alvarlega. Þetta kemur fram í pistli hennar sem birtist hjá Vísi.

„Litli frændi minn greip um höfuðið og sagði: „Nei, ekki aftur! Ég hata þessa veiru“.

Ég held að við getum öll tekið undir með frænda mínum, en veiran herjar nú samt sem áður á okkur aftur með endurnýjuðum krafti. Við hér í Eyjum tökum það mjög alvarlega og höfum brugðist hart við.“

Aðgerðarstjórn Vestmannaeyja var virkjuð fyrir helgi þegar ljóst varð að smit hafi komið upp í gleðskap sem haldinn var í Vestmannaeyjum um verslunarmannahelgina. Þurfti í kjölfarið fjöldi Eyjamanna að fara í sóttkví.

Vestmannaeyjabær hefur sent samræmdar leiðbeiningar til leikskóla og frístundavara og heimsóknarreglur í búsetukjörnum áhættuhópa.

„Síðasta laugardag voru allir þeir sem komnir voru í sóttkví boðaðir í skimun á vegum Íslenskrar erfðagreiningar og HSU í Vestmannaeyjum. Með þessum tveimur stóru skimunum og hefðbundinni einkennaskimun hjá HSU hafa vel yfir 600 manns verið skimaðir á nokkrum dögum. Þetta er um 14% íbúa í Eyjum. Þetta skiptir máli! Það var ekki síst mjög víðtæk skimun sem hjálpaði okkur út úr þeim vanda sem var hér í vetur. við bregðumst eins við núna“