Markaður Fréttablaðsins skýrir frá þessu í dag. Fram kemur að félög í eigu þremenninganna hafi höfðað mál gegn félaginu og krefjist þess að hlutir þeirra verði innleystir gegn greiðslu upp á 1.563 milljónir króna auk dráttarvaxta.
Fram kemur að hluthafarnir saki Kristján Loftsson, framkvæmdastjóra og stærsta einstaka hluthafa Hvals um að hafa með kaupum hans á hlutum í Hval á „verulegu undirverði“ og fráfalli stjórnar félagsins á forkaupsrétti sínum að þeim aflað Kristjáni ótilhlýðilegra hagsmuna á kostnað annarra hluthafa.
Þeir fara fram á að upplausnarvirði Hvals verði lagt til grundvallar við innlausn bréfanna. Ef miðað er við gengið í kröfum þeirra má áætla að upplausnarvirði Hvals sé um 30 milljarðar.
Markaðurinn hefur eftir Kristjáni að kröfur þremenninganna um að vera keyptir út miðað við upplausnarverð fyrirtækisins feli í sér að leysa verði fyrirtækið upp.
„Verði fallist á kröfurnar getum við átt von á því að aðrir hluthafar komi í kjölfarið og fari fram á að vera keyptir út á sama gengi og félaginu yrði því slitið. Ég tel hins vegar að vilji meginþorra hluthafa Hvals standi ekki til þess.“
Eigið fé Hvals er 25 milljarðar og er fyrirtækið eitt stöndugasta fjárfestingafélag landsins.