Katrín Jakobsdóttir, forsætisráðherra, ætlar á næstunni að boða formenn stjórnmálaflokkanna á fund til að ræða tímasetningu næstu þingkosninga. Forystumenn ríkisstjórnarinnar vilja klára fullt kjörtímabil og kjósa í lok október 2021 en stjórnarandstaðan vill láta kjósa næsta vor.

Fréttablaðið skýrir frá þessu í dag.

„Yfirstandandi kjörtímabili lýkur 28. október 2021 og það hefur engin ákvörðun verið tekin um að boða til kosninga fyrr.“

Hefur blaðið eftir forsætisráðherra sem útilokar þó ekki að boðað verði til kosninga aðeins fyrr.

Bjarni Benediktsson, fjármálaráðherra, hefur sagt að hans skoðun sé að það eigi að klára fullt kjörtímabil og kjósa að hausti en formenn flestra stjórnarandstöðuflokkanna vilja kjósa í vor og vísa bæði til hefða og að ný ríkisstjórn þurfi að hafa nægan tíma til að undirbúa fjármálastefnu og fjárlög.

„Ég mun boða formenn allra flokka til fundar á næstunni til að fara yfir þessi sjónarmið, áður en við tökum ákvörðun.“

Er haft eftir forsætisráðherra.