„Er lífshættulegt að búa á landsbyggðinni?“ er yfirskrift greinar eftir Berglindi Hörpu Svavarsdóttur, bæjarfulltrúa Sjálfstæðisflokksins á Fljótsdalshéraði en hún skipar 2. sæti á lista Sjálfstæðismanna í nýju sameinuðu sveitarfélagi á Austurlandi.
Í byrjun greinar sinnar áréttar Berglind þá skoðun Sjálfstæðismanna á landsbyggðinni að Reykjavíkurflugvöllur eigi að vera áfram staðsettur í Vatnsmýrinni, sem miðstöð sjúkraflugs í landinu. „Þar er um brýnt öryggismál að ræða því tíminn skiptir öllu máli í bráðaveikindum hvort sem um er að ræða tíminn eftir lendingu og að sérhæfðu bráðaþjónustunni eða fyrstu viðbrögð úti á landsbyggðinni við bráðaveikindum.Samkvæmt lögum um heilbrigðisþjónustu eigum við öll að hafa jafnan aðgang að fullkomnustu heilbrigðisþjónustu á hverjum tíma hvar sem við búum á landinu,“ segir Berglind.
Berglind fer síðan yfir ástand þessara öryggisþátta á hinu víðfeðma Austurlandi þar sem sjúkraflugvellir eru staðsettir á Egilsstöðum og í Neskaupsstað:
„Austurland er mjög víðfemt. Til að komast á milli staða þarf að aka í gegnum göng, yfir heiðar og fyrir skriður í allskonar veðrum. Því skiptir það miklu máli að hægt sé að fullnaðarbráðagreina við báða sjúkraflugvellina og koma sjúklingi þannig sem fyrst í viðeigandi læknismeðferð. Hver mínúta skiptir máli. Mikið vantar upp á að greiningartæki séu til staðar á Egilsstöðum til fullnaðargreininga í bráðatilvikum.“
Berglind segir að efla þurfi tækjakost á heilsugæslunni á Egilsstöðum svo hún verði betur í stakk búin til bráðagreiningar:
„Sjálfstæðisflokkurinn í sameinuðu sveitarfélagi leggur því áherslu á að lagt verði fjármagn í kaup á sneiðmyndatæki og öðrum nauðsynlegum tækjakosti til fullnaðarbráðagreiningar á heilsugæslunni á Egilsstöðum. Þannig styttum við viðbragðstímann í bráðaveikindum fólks á Austurlandi, flýtum því að rétt meðferð geti hafist og aukum líkur á að fólk nái fyrri heilsu á ný.“