Guðni Th. Jóhannesson, forseti, hlaut 92,2 prósent gildra atkvæða í forsetakosningunum í gær. Þetta er næst hæsta atkvæðahlutfall sem forsetaframbjóðandi hefur fengið í forsetakosningum hér á landi. Vigdís Finnbogadóttir fékk betri kosningu 1988 þegar hún hlaut 94,6% atkvæða. Hún varð þá fyrst sitjandi forseta til að fá mótframboð.

RÚV skýrir frá þessu. Fram kemur að frá því að þjóðin kaus sér forseta í fyrsta sinn 1952 hafi 31 einstaklingur boðið sig fram til embættisins, sumir oftar en einu sinni. Níu sinnum hefur verið kosið á þessum 68 árum. Fimm sinnum hefur frambjóðandi fengið meirihluta atkvæða og fimm sinum hefur frambjóðandi fengið innan við eitt prósent atkvæða.

Eins og fyrr sagði fékk Guðni Th. Jóhannesson 92.2 prósent atkvæða í gær og er það næst hæsta atkvæðahlutfall frambjóðenda frá upphafi. Ólafur Ragnar Grímsson fékk 85,6 prósent atkvæða 2004 þegar tvö mótframboð komu fram. Þá skilaði fimmtungur kjósenda auðu. Þær kosningar voru haldnar skömmu eftir að Ólafur Ragnar synjaði lögum frá Alþingi staðfestingar, fyrstur forseta. Hann fékk 52,8 prósent atkvæða í kosningunum 2012.