„Ég mun rannsaka það og er þegar byrjaður á því. Máli Kristjáns Þórs er ekki lokið. Þar er mörgum spurningum enn ósvarað,“
segir Jón Þór Ólafsson, þingmaður Pírata og nýr formaður stjórnskipunar- og eftirlitsnefndar, sem hyggst taka upp þráðinn í máli Kristjáns Þórs Júlíussonar sjávarútvegsráðherra um hæfi hans, vegna vinatengsla sinna við forstjóra Samherja, eftir að Þórhildur Sunna Ævarsdóttir sagði af sér embætti formanns nefndarinnar.
„Kristján þarf að svara því hvernig hann hefur verið að meta hæfi sitt. Það liggur ekki fyrir. Þá þarf einnig að skoða verkferlana við mat á hæfi ráðherra, því eftir að Samherjamálið kom upp var reglunum um verkferlana breytt, og þá þarf að vita hvernig reglurnar voru þar á undan. Því þá má kannski sjá hvort menn hafi verið að breyta reglum og verkferlum, til þess að gera hlutina þægilegri fyrir ráðherra,“
segir Jón Þór, en fréttamaðurinn Helgi Seljan er meðal þeirra sem upplýstu um Samherjamálið í Kveiksþætti RÚV.
Nánar er talað við Jón Þór í helgarblaði DV