Þórarinn Tyrfingsson, sem vill verða formaður SÁÁ að nýju, vill að stjórn samtakanna taki ákvörðun um það hvort rekstri spilakassa verði hætt, en tekjur af þeim nema um 60 milljónum á ári til samtakanna. Hyggst hann sjálfur eiga frumkvæði að því að málið fari fyrir stjórnina. Þetta segir hann í samtali við Eyjuna.
Mikil umræða hefur skapast í kjölfar Covid-19 um hvort rekstur spilakassa hér á landi eigi rétt á sér, þar sem þeir ýti undir spilafíkn með tilheyrandi afleiðingum í stórum stíl.
Nýr formaður SÁÁ verður kjörinn á aðalfundi þann 30. júní næstkomandi, þar sem Arnþór Jónsson, sitjandi formaður, hyggst ekki gefa kost á sér.
Þeir Einar Hermannsson, stjórnarmaður í SÁÁ og Þórarinn Tyrfingsson, sem hætti sem formaður SÁÁ árið 2017, hafa báðir boðið sig fram og stefnir í harðan slag.
Einar skrifar í grein á Vísi í dag að starf SÁÁ verði „aldrei byggt á einum manni og enn síður fornri frægð eða gömlum afrekum,“ sem skilja má sem sneið til mótframbjóðanda hans.
Einar segir einnig í greininni að hann hyggist róa öllum árum að því að SÁÁ hætti rekstri spilakassa, sem skili um 60 milljónum á ári til samtakanna, en SÁÁ hefur þegar farið 200 milljónum króna fram úr samþykktum áætlunum í rekstrinum undanfarin tvö ár:
„Ekki verður komist hjá því að nefna eina stoð í rekstri SÁÁ sem sannast sagna er fúin. Þetta er þátttaka í rekstri spilakassa. Þessi þátttaka SÁÁ skilar um 60 milljónum króna inn í rekstur SÁÁ á ári. Ljóst er að þetta fé verður að koma annars staðar frá. Trúverðugleiki SÁÁ er langt um verðmætari en svo að eiga þátt í að magna upp fleiri samfélagsleg vandamál, líkt og spilafíkn augljóslega er. SÁÁ verður að hætta þátttöku í rekstri spilakassa!“
Sjá einnig: Formannsframbjóðandi SÁÁ:Spilakassatekjur „svartur blettur“ á starfseminni
Einar nefnir að fjárhagurinn mætti vera betri, en nefnir ekki hvaðan fjármunirnir sem verða til með rekstri spilakassa eigi að koma:
„Ekki þýðir að halda áfram þeirri aðferðarfræði að fara bónleiðina til stjórnvalda fyrir fjárlög með tilheyrandi árvissum fjölmiðlahasar, heldur þarf að tryggja starfinu viðunandi rekstrargrundvöll fram í tímann og auka allan fyrirsjáanleika í rekstri. Jafnframt verðum við að tryggja faglegt og rekstrarlegt sjálfstæði samtakanna.“
Þórarinn sagði við Eyjuna að hann þekkti málið út og inn, þar sem málið hefði komið til skjalanna í formannstíð hans. Það hefði alltaf verið umdeilt og margsinnis farið fyrir stjórn SÁÁ:
„Þetta er mál sem hefur alltaf á vissan hátt verið umdeilt, en það eru mörg rök fyrir því að við fáum peninga í gegnum þetta,“
sagði Þórarinn, en bætti við að samtökin yrðu vissulega að taka mið af umræðunni um málið og spilafíkn væri alvarlegt mál hér á landi.
Aðspurður hvaða afstöðu hann hefði sjálfur til málsins, hvort hann hygðist taka málið upp sjálfur, sagði hann að ákvörðunin lægi hjá 48 manna stjórn samtakanna:
„Stjórnarformaðurinn er stjórnarformaður þessarar 48 manna stjórnar og verður að leggja málið þar fyrir. Hvaða málstað ég mun flytja fyrir stjórnina kemur bara á daginn, en þangað þarf málið að fara.“
Aðspurður hvort Þórarinn hygðist sjálfur leggja málið fyrir stjórnina, hlyti hann kosningu, sagði hann svo vera:
„Ég mun örugglega taka það fyrir. Það er bara sanngjarnt.“
Þá sagði Þórarinn jafnframt að ekki þýddi að krefja ríkið um frekari fjármagn fyrir rekstrinum:
„Það er alveg ótækt að ætla að fara bara til ríkisins ef maður er með halla á rekstrinum, það er bara ekki á dagskrá. Maður verður að taka til heima hjá sér fyrst. Og ef við ætlum að leggja þessa spilakassa niður þarf að leggja fram áætlanir til að mæta því tekjutapi.“
