Alfreð Þorsteinsson, fyrrverandi borgarfulltrúi Framsóknarflokksins og stjórnarformaður Orkuveitunnar, lést í nótt, 76 ára að aldri. Greint er frá þessu á heimasíðu íþróttafélagsins Fram, hvar Alfreð var heiðursfélagi eftir að hafa gegnt mýmörgum trúnaðarstörfum fyrir félagið.
Alfreð varð varaborgarfulltrúi Framsóknarflokksins árið 1970, en tók við sem aðalmaður árið eftir þangað til ársins 1978. Var hann varafulltrúi frá 1986-1994 en sat síðan fyrir Reykjavíkurlistann þangað til 2006.
Hann var einnig blaðamaður á Tímanum frá 1962-1977 og skrifaði meðal annars mikið um íþróttir. Þá varð hann forstjóri Sölu varnaliðseigna til 2003 þegar hún var lögð niður.
Alfreð lætur eftir sig eiginkonuna Guðnýju Kristjánsdóttur, dæturnar Lindu Rós og Lilju Dögg, (menntamálaráðherra) og þrjú barnabörn.
Vottar Eyjan aðstandendum Alfreðs innilega samúð sína.