Samkvæmt grunnsviðsmynd Samtaka Atvinnulífsins (SA) og Viðskiptaráðs Íslands (VÍ) má gera ráð fyrir 13% samdrætti í landsframleiðslu vegna efnahagslegra áhrifa kórónuveirufaraldursins. Það getur tekið allt að sjö ár að vinna þetta framleiðslutap upp.
Fréttablaðið skýrir frá þessu. Fram kemur að ef þessi sviðsmynd rætist og hagvöxtur verður undir meðallagi næstu árin geti tekið sjö ár að vinna þetta framleiðslutap upp. Segja SA og VÍ að leita þurfi aftur til 1920 til að finna meiri samdrátt í íslensku efnahagslífi.
„Meginniðurstaðan er sú að við erum að sigla inn í mjög djúpa kreppu sem gæti fært landsframleiðslu á mann átta ár aftur í tímann, miðað við grunnsviðsmynd.“
Er haft eftir Konráð S. Guðjónssyni, aðalhagfræðingi VÍ.
Í greiningunni kemur fram að aðgerðapakkar ríkisstjórnarinnar og efnahagssamdráttur muni hafa 330 milljarða króna neikvæð áhrif á rekstur ríkissjóðs.
„Þegar kemur að næstu aðgerðum hagstjórnar er boltinn hjá Seðlabankanum. Þrátt fyrir að bankinn hafi fyrir tveimur mánuðum lækkað stýrivexti í tvígang eru vextir hér langtum hærri en það sem við sjáum í öðrum iðnríkjum. Seðlabankinn hefur því ónotað svigrúm.“
Hefur Fréttablaðið eftir Ásdísi Kristjánsdóttur, forstöðumanni efnahagssviðs Samtaka atvinnulífsins, sem sagði einnig að lítið hafi heyrst frá Seðlabankanum að undanförnu og að mikilvægt sé að hann virki enn frekar stjórntæki sín og þær aðgerðir sem boðaðar hafi verið.