Bogmaðurinn ehf. er fyrirtæki Ágústu Johnson athafnakonu og eiginkonu Guðlaugs Þórs Guðlaugssonar, utanríkisráðherra. Félagið hlaut um 330 milljónir í arðgreiðslur frá Bláa lóninu milli áranna 2012 og 2019, en félagið á 2.4% í Bláa lóninu. Hagnaður Bogmannsins á sama tíma var um 530 milljónir króna.

Stundin greinir frá þessu og setur í samhengi við að Bláa lónið hafi verið meðal fyrstu fyrirtækja sem tilkynnti um að það ætlaði að nýta sér hlutabótaleið ríkisstjórnarinnar, en með því sparar Bláa lónið sér 200 milljónir á mánuði í launagreiðslur.

Arðgreiðslur Bláa lónsins milli áranna 2012-2019 námu um 12.3 milljörðum króna alls og hefur fyrirtækið verið gagnrýnt fyrir að ganga á sjóði almennings með þessum hætti, eftir ævintýralegan hagnað síðustu ára.

Guðlaugur Þór átti helmingshlut í félaginu þangað til árið 2008, en Ágústu hefur átt það ein síðan, sem og bréfin í Bláa lóninu.

Ekki er minnst á Bogmanninn í hagsmunaskrá Guðlaugs Þórs á vef Alþingis, en þess má geta að reglur forsætisnefndar Alþingis um skráningu á fjárhagslegum hagsmunum þingmanna, ná ekki til eigna, eða skulda, maka.