„Íslenskar landbúnaðarafurðir eru kaskótrygging þjóðarinnar,“ segir Guðni Ágústsson, fyrrverandi formaður Framsóknarflokksins í grein í Morgunblaðinu í dag.
Hann bendir á að um 50 lönd hafi nú stöðvað vöruflutninga til umheimsins og ein afleiðing kórónuveirunnar geti verið vöruskortur. Hann spyr hvernig stjórnvöld hyggist bregðast við:
„Hvað ætli ríkisstjórnin bjóði bændum nú? Nú er tækifæri til að styrkja innviði grænmetisframleiðslunnar og bæta samkeppnisstöðu matvæla sem framleidd eru í guðs grænni náttúrunni í gróðurhúsum við jarðhita og lýsingu frá orkulindum Íslands. Betri gjöf gæti ríkisstjórnin ekki gefið þjóð sinni á tímum hinnar breyttu heimsmyndar.“
Guðni vill að raforkuverð verði lækkað til gróðurhúsa svo hefja megi græna stóriðju; matvælaframleiðslu:
„Við eigum að ráða við að framleiða allt það grænmeti sem í dag er flutt inn og ræktað í erlendum gróðurhúsum, með okkar eigin vistvæna rafmagni og jarðhita,“
segir Guðni.
Guðni álásar matvælalöggjöf Evrópusambandsins og segir hana ástæðu þess að Ísland sé á góðri leið með að færa garðyrkjuna úr landi:
„Tökum gróðurhúsaframleiðsluna á síðasta ári sem dæmi. Við fluttum inn 1.500 tonn af tómötum eða 56% neyslunnar. Af papriku fluttum við inn 1.600 tonn eða 89% þess sem neytt er í landinu. Af salati 1.300 tonn eða 76%. Gúrkan ein heldur velli, en af henni eru aðeins flutt inn 55 tonn eða um 3% neyslunnar. Af sveppum eru flutt inn 330 tonn eða 37%. Við flytjum inn 1.055 tonn af blómum. Innflutningurinn hefur aukist gríðarlega ár frá ári eftir 2011/
Hið holla og magnaða útiræktaða grænmeti úr hreinni móður jörð fór að gefa verulega eftir þegar matvælalöggjöf ESB tók að bíta. Inn voru flutt af blómkáli 620 tonn árið 2019, eða 89% neyslunnar. Af gulrótum 980 tonn eða 52. Af hvítkáli 607 tonn eða 71%. Af kínakáli 154 tonn eða 84%. Af spergilkáli 500 tonn eða 83%. Gulrófur og kartöflur standa sig vel, aðeins 13% af neyslunni af hvorri tegund eru flutt inn,“
segir Guðni og nefnir að breyttar aðstæður í heiminum kalli á að grænir fingur grænmetisbænda verði virkjaðir.