„Nokkuð hefur borið á því að starfsfólki verslana sé sýndur dónaskapur,“ segir Ragnar Þór Ingólfsson, formaður VR í færslu á Facebook hvar hann hvetur til kurteisi í samskiptum kúnna við starfsfólk verslana. Hann segir stutt í pirringinn á tímum Covid-19, en gæta þurfi að almennri kurteisi:
„VR hefur borist töluvert af kvörtunum þess efnis. Það er mikilvægt að fólk hafi í huga að allir eru að gera sitt besta í að halda samfélaginu gangandi. Við erum að sjálfsögðu áhyggjufull yfir ástandinu og óvissunni. Það skilar sér í þreytu og streitu og sjálfsagt getur verið stutt í pirring. En við megum ekki undir nokkrum kringumstæðum láta það bitna á framlínufólki í verslunum sem leggur heilsu sína undir í að sjá okkur fyrir nauðsynjavörum og annarri þjónustu sem við teljum sjálfsagða á tímum sem þessum. Starfsfólk í verslun er í hópi þeirra sem halda samfélaginu gangandi.“
Ragnar Þór hvetur fólk til að koma vel fram við hvert annað
„Stöndum saman í gegnum þetta og verum dugleg að hrósa.“