Gunnar Smári Egilsson, stofnandi Sósíalistaflokks Íslands, hyggst ekki bjóða sig fram á lista flokksins í næstkomandi Alþingiskosningum, en flokkurinn hefur gefið það út að hann hyggist stefna að framboði.

Þetta kemur fram í viðtali við hann í Mannlífi í dag.

„Ég hef sjálfur engin áform um að fara á þing. Ég sé mig ekki fyrir mér í ræðustól Alþingis að tala um fundarstjórn forseta. Ég er bestur í að byggja upp baráttuna og halda utan um hana, ekkert ósvipað og ég byggði upp blöð á sínum tíma,“

segir Gunnar Smári. Hann segir það ekki lokamarkmiðið að koma flokknum á þing:

„Mikilvægasta verkefnið er að byggja upp virka stjórnmálaþátttöku almennings og fylkja ólíkum hópum saman til baráttu gegn þeim sem hafa rænt almenning völdum sínum og lífsafkomu. Það er verkefnið, framboð til þings er aðeins hluti af þessari baráttu, alls ekki lokamarkmið. Lokamarkmið er að alþýðan taki völdin sem tilheyra henni, taki þau af auðvaldinu, og sendisveinum þess, og móti samfélag að eigin hagsmunum og væntingum.“