Frumvarp Ásmundar Einars Daðasonar, félagsmálaráðherra, um breytingar á lögum um Ábyrgðarsjóð launa og atvinnuleysistryggingar, var samþykkt í síðustu viku. Með því er ætlunin að koma til móts við atvinnurekendur og launafólk í ljósi efnahagsaðstæðna af völdum kórónaveirufaraldursins og forðast uppsagnir í lengstu lög.

Mun ríkið því greiða milli 25 og 75 prósent launa fólks, gegn ákveðnum skilyrðum. Hámark á heildartekjum er til dæmis 700 þúsund.

Mikill kostnaður

Kjarninn greinir frá því í fréttaskýringu í dag að samkvæmt kostnaðarmati á frumvarpinu, sé í versta falli gert ráð fyrir því að aðgerðirnar muni kosta ríkissjóð tæpa um 32 milljarða frá 15. mars til 31. maí.

Áður hafði Ásmundur sagt að kostnaðurinn yrði á bilinu 12-20 milljarðar, en þar studdist Ásmundur við bjartsýnni spár sem gerðu ráð fyrir að 20-30 þúsund manns nýttu sér úrræðið.

Samkvæmt svörtustu spám er gert ráð fyrir að 50 þúsund manns fari fram á greiðslu hluta launa sinna úr Atvinnuleysistryggingasjóði, sem er um fjórðungur alls vinnuafls á Íslandi, en alls eru um 195 þúsund manns á vinnumarkaði samkvæmt tölum Hagstofu Íslands. Rúmlega níu þúsund eru á atvinnuleysisskrá, en atvinnuleysi í febrúar mældist um fimmprósent.

Af þessum 50 þúsund manns sem gætu nýtt sér úrræðið er gert ráð fyrir:

• Að helmingurinn, 25 þúsund manns, fari fram á greiðslur fyrir 25% starfshlutfall
• Að 30% þeirra fari fram á greiðslur fyrir hálft starfshlutfall
• Að fimmtungur fari fram á greiðslur fyrir 75% starfshlutfall

Er kostnaðurinn talinn nema tæpum 13 milljörðum á mánuði.