Í lok árs 2018 var það ákveðið að nota 5 milljónir króna í að skipta um gólfdúk og fleiri úrbætur á bókasafninu í Ráðhúsi Árborgar á Selfossi. Nú stefnir það hins vegar í að verkefnið muni kosta rúmlega 100 milljónir. Bæjarfulltrúar Árborgar vilja að gerð sé rannsókn á framkvæmdunum. RÚV greinir frá þessu.
Þessar 5 milljónir eru nú komnar upp í 65 milljónir. Búist er við því að það eigi enn eftir að bætast við útgjöld upp á 40 milljónir. Heildarkostnaðurinn mun því hljóða upp á 105 milljónir, 100 milljónum meira en upphaflega var gert ráð fyrir.
Gísli Halldór Gíslason, bæjarstjóri í Árborg, segir að það megi rekja aukna kostnaðinn til þess að það þurfti að flytja þjónustuver ráðhússins niður á bókasafn þegar það var byrjað að dúkleggja þar. „Það er nú meginmálið,“ segir Gísli. „Síðan gleymist að, þegar gerður er viðauki, að þá hefur gleymst að setja inn kostnað vegna hönnunar. Það er auðvitað þannig að þegar þú ferð í að hanna svona stórt og gott hús og velur þér arkitekta að þú ætlar kannski ekki að taka þann ódýrasta. Þú ætlar að reyna að fá þann sem skilar þér góðri vinnu.“
Gunnar Egilsson, oddviti Sjálfstæðisflokksins í bæjarstjórn og fulltrúi minnihlutans, tjáir sig um málið við RÚV. „Í öllum svona opinberum framkvæmdum þarf að byrja á því að teikna, byrja á því að ráða arkitekta, síðan þarf að teikna þetta upp og síðan þarf að fá tilboð í verkið í heild sinni og vinna það eftir þeim vinnubrögðum. Það eru eðlileg vinnubrögð,“ segir Gunnar en hann vill meina að það hafi ekki verið raunin í þessu verkefni.
Gunnar er þó ekki sammála því. „5 milljónir í tæpar hundrað milljónir eða yfir hundrað milljónir, er það eðlilegt? Nei það er ekki eðlilegt. Við þurfum að hugsa um fé íbúa.“