Verkfall Eflingar hefur staðið yfir í 10 daga og hefur haft víðtækar afleiðingar í Reykjavík, ekki síst fyrir barnafólk, vegna lokana leikskóla. Annar angi er þó á verkfallinu, þar sem allir borgarstarfsmenn Eflingar í sorphirðu hafa einnig lagt niður störf og eru ruslatunnur Reykjavíkurborgar víða yfirfullar. Því fýkur ruslið um borgina sem aldrei fyrr.
Samkvæmt Hjalta Guðmundssyni, skrifstofustjóra umhverfis – og skipulagssviðs Reykjavíkurborgar, sjá þó verktakar um miðborgarhreinsun á skilgreindum svæðum einu sinni á dag, en það dugar skammt. Hvetur hann almenning til þess að ganga snyrtilega um og koma ruslinu í endurvinnslustöð.
Ragnar Önundarson, fyrrverandi bankastjóri og sjálfskipaður útlitsrýnir Sjálfstæðisflokksins, leggur til að Dagur B. Eggertsson borgarstjóri beiti sér sjálfur í málinu:
„Æðsti stjórnandi borgarinnar hefur leyfi til að ganga í öll störf. Hann ætti að tína þetta upp og fara með í Sorpu.“
Þá spyr Björgvin Guðmundsson, einn eigandi hjá ráðgjafafyrirtækinu KOM, hvort að borgarbúar fái ekki afslátt af gjöldum borgarinnar meðan á verkfallinu stendur, og beinir orðum sínum til Þórdísar Lóu Þórhallsdóttur, formanns borgarráðs:
„Gjöld [sveitarfélaga] mega aldrei vera hærri en sem nemur rökstuddum kostnaði við veitta þjónustu,“ segir í lögum. Nú fá borgarbúar ekki rusl hirt og þurfa margir að vera heima með börnum. Fá þeir þá ekki afslátt af þessum gjöldum? @Reykjavikurborg @ThordisLoa“
„Gjöld [sveitarfélaga] mega aldrei vera hærri en sem nemur rökstuddum kostnaði við veitta þjónustu,“ segir í lögum. Nú fá borgarbúar ekki rusl hirt og þurfa margir að vera heima með börnum. Fá þeir þá ekki afslátt af þessum gjöldum? @Reykjavikurborg @ThordisLoa
— Bjorgvin Gudmundsson (@BjorgvinG) February 25, 2020