Í niðurstöðum könnunarinnar kemur fram að rétt rúmlega 5% landsmanna noti rafrettur og af þeim er tæplega helmingur sem notar þær daglega. Um 3% í viðbót nota rafrettur stundum og um fjórðungur landsmanna hefur auk þess prófað þær. Um 70% landsmanna hafa aldrei prófað að reykja rafrettur.
Þá eru karlar líklegri en konur til að hafa prófað rafrettur samkvæmt niðurstöðunum. Af þeim sem nota rafrettur daglega eru flestir undir þrítugu og eftir því sem fólk er yngra þá er það líklegra til að hafa prófað að reykja rafrettu. Nær einn af hverjum tíu undir þrítugu notar rafrettur reglulega og tæplega helmingur til viðbótar hefur prófað þær.
Einnig kemur fram að þeir sem myndu kjósa Pírata og Vinstri græn í næstu kosningum nota rafrettur hvað mest. Þá eru þeir sem kysu Miðflokkinn eða Framsóknarflokkinn ólíklegri til að hafa prófað rafrettur en kjósendur annarra flokka.
Einnig var notkun á nikótínpúðum skoðuð í könnuninni en þeir eru nýrri af nálinni en rafretturnar. Þó hafa þeir náð vinsældum meðal ungs fólks. Þá eru karlar líklegri en konur til að nota og prófa nikótínpúðana. Eftir því sem fólk er yngra þá er líklegra að það noti nikótínpúða eða hafi prófað þá. Um 17% fólks undir þrítugu nottar nikótínpúða og um 24% til viðbótar hafa prófað þá. Þeir sem myndu kjósa Sjálfstæðisflokkinn, Pírata eða Viðreisn eru líklegri til að nota nikótínpúða en kjósendur annarra flokka.
