Ísland hefur setið í mannréttindaráði Sameinuðu þjóðanna síðan árið 2018 eftir að Bandaríkjastjórn sagði sig óvænt úr ráðinu. Lauk kjörtímabili Íslands um áramótin og í nýrri skýrslu utanríkisráðuneytisins um setu Íslands segir að öll markmið Íslands hafi náðst í öllum aðalatriðum.
„Seta Íslands í mannréttindaráðinu er án efa eitt mikilvægasta verkefni sem íslensku utanríkisþjónustunni hefur verið falið og einn af hápunktum þess sem ég hef fengist við í embætti utanríkisráðherra. Verkefnið var prófsteinn á það hvernig íslenska utanríkisþjónustan tekst á við stór og vandasöm verkefni. Ef marka má umsagnir alþjóðlegra mannréttindasamtaka og stórra erlendra fjölmiðla má segja að við höfum staðist þá prófraun,“
segir í aðfararorðum Guðlaugs Þórs Þórðarsonar, utanríkis- og þróunarsamvinnuráðherra, í skýrslunni.
Guðlaugur Þór segir við Morgunblaðið í dag að til greina komi að sækja um aðild að nýju árið 2025 náist um það þverpólitísk samstaða á þingi:
„Þetta getur ekki verið mál sitjandi ríkisstjórnar eða Sjálfstæðisflokksins.“
Guðlaugur segir að heillavænlegra sé að gefa kost á sér í mannréttindaráðið en önnur ráð, þar sem Ísland standi vel að vígi í málaflokknum, en sem kunnugt er sótti Ísland fast að því að komast í Öryggisráð Sameinuðu þjóðanna árið 2009 með tilheyrandi kostnaði, án árangurs.
Norðurlöndin hafa skipt með sér framboðinu til setu í mannréttindaráði. Danir tóku við af Íslandi út næsta ár, en Finnar hyggjast síðan gefa kost á sér 2022-2024.