Þátturinn Trans börn var sýndur á Stöð 2 í fyrradag, þar sem fylgst er með hvernig fjórar fjölskyldur takast á við þá áskorun að eiga trans barn.
Þar kom fram að ekki hafi fengist aðstoð við sálrænum erfiðleikum eins barnsins fyrr en kom í ljós að það stríddi við sjálfsvígshugleiðingar. Það hafi verið „töfraorðið“ sem hafi komið barninu inn á Barna- og unglingageðdeild Landspítalans (BUGL) , þegar barnið hafi náð tilfinningalegum botni.
BUGL var sagt fjársvelt í þættinum og að sprenging hefði orðið í fjölda tilvísana í transteymi deildarinnar. Reiknað hafi verið með um tveimur, til þremur tilvísunum á ári, en í raun voru tilvísanirnar 26, eða 13 sinnum fleiri en fyrir fimm árum.
Í tilkynningu frá BUGL í dag segir að unnið sé að úrbótum á erfiðri stöðu sem rekja megi til þess að erfitt sé að finna sérfræðinga í málaflokknum, þar sem margir hafi látið af störfum.
„Vegna frétta í fjölmiðlum um transteymi barna- og unglingageðdeildar Landspítala (BUGL) vill spítalinn árétta að þjónusta fyrir þennan hóp er ennþá til staðar á deildinni en unnið er að því að finna bót á erfiðri stöðu þar sem skapast af skorti á fagmenntuðu starfsfólki til að manna teymið.
Þekkingin er afskaplega sérhæfð og það getur verið tímafrekt að finna nýja sérfræðinga í stað þeirra sem hætta. Breytingin á þjónustunni er ekki önnur en sú að umræddur sjúklingahópur er nú þjónustaður tímabundið á hefðbundinni göngudeild BUGL en ekki af sérstöku transteymi eins og áður var. Bráðaþjónusta er líka alltaf til staðar. Landspítali vinnur nú að umbótum í góðu og nánu samstarfi við heilbrigðisráðuneytið vegna þess.“