Meirihluti bæjarstjórnar Ísafjarðarbæjar hefur ákveðið að ráða Birgi Gunnarsson í starf bæjarstjóra Ísafjarðarbæjar, en sem kunnugt er hætti fyrrverandi bæjarstjórinn Guðmundur Gunnarsson óvænt störfum á dögunum. Frá þessu er greint í tilkynningu frá Ísafjarðarbæ.

Þórdís Sif Sigurðardóttir hefur verið starfandi bæjarstjóri í millitíðinni, en hún sótti sjálf um sveitarstjórastöðuna í Borgarbyggð og fékk.

Birgir er fyrrerandi forstjóri Reykjalundar og var sagt upp á þar fyrirvaralaust af stjórninni í október í fyrra eftir 12 ár í starf. Það mál varð til þess að fjölmargir aðrir starfsmenn hættu í kjölfarið og mikið uppnám varð á vinnustaðnum. Að lokum þurfti að skipa nýja starfsstjórn á Reykjalundi til að lægja öldurnar eftir að nánast enginn læknir eða sérfræðingur var eftir til að sinna vistmönnum.

Birgir er fæddur árið 1963 og er uppalinn á Siglufirði og lauk þaðan grunnskólanámi. Hann er stúdent frá Fjölbrautaskóla Norðurlands vestra á Sauðárkróki og rekstrarfræðingur frá Háskólanum á Bifröst. Því til viðbótar lauk hann námi í rekstri og stjórnun frá Háskólanum í Gautaborg.

Birgir á þrjú börn, þau Sævar, Gunnar og Birgittu, og er í sambúð með Astrid Boysen.

Til loka ársins 2019 var Birgir forstjóri Reykjalundar endurhæfingarmiðstöðvar í Mosfellsbæ. Þar áður var hann forstjóri á Heilbrigðisstofnuninni á Sauðárkróki, frá 1991-2007.

Birgir hefur gegnt ýmsum trúnaðarstörfum s.s. setið stjórn Norræna heilbrigðisháskólans í Gautaborg, verið formaður Landssambands heilbrigðisstofnana, formaður Félags forstöðumanna heilbrigðisstofnana og ýmislegt fleira.