Reynir Traustason, ritstjóri Mannlífs veltir fyrir sér framtíð Kristjáns Þórs Júlíussonar, sjávarútvegs- og landbúnaðarráðherra í orðróms-pistli á Mannlífi í dag. Hann telur að Kristján hafi málað sig út í horn í vikunni, þegar hann sagði sauðfjárbændur stunda starf sitt af áhugamennsku. Þar hafi ráðherrann bætt gráu ofan á svart, og telur að „útspilið sé sjálfhætt“.
„Kristján Þór Júlíusson, ráðherra sjávarútvegs og landbúnaðar, hefur bókstaflega hleypt öllu í bál og brand með ummælum sínum um að sauðfjárbændur stundi starf sitt af áhugamennsku. Um allt land er ráðherranum úthúðað fyrir taktleysi og áhugaleysi á einni mikilvægustu starfsgrein Íslendinga.
Fyrir var Kristján í ímyndarkreppu vegna Samherja og tengsla sinna við frændur sína og vini þar. Andstæðingar hans hafa skilgreint hann sem ráðherra Samherja og sjálfir hafa Samherjamenn lýst honum sem vini. Kristján hefur ekkert látið uppi um áform sín í komandi kosningum en talið er að eftir nýjasta útspilið sé sjálfhætt hjá honum.“
Þá nefnir Reynir mögulega „arftaka“ Kristjáns. Annars vegar nafna hans Kristján Þór Magnússon, bæjarstjóra á Húsavík. Og hins vegar Ásthildi Sturludóttur, bæjarstjóra á Akureyri, sem lét líkt og ráðherrann umdeild ummæli falla í vikunni, er gaf í skyn að Reykvíkingar væru kærulausari en Akureyringar.
„Meðal þeirra sem nefndir eru sem arftakar er Ásthildur Sturludóttir, bæjarstjóri á Akureyri, sem að vísu lenti í ógöngum eftir að hafa sýnt höfuðborgarbúum hroka í tengslum við Covidsmit.“