Ríkisstjórnin samþykkti á fundi sínum í morgun að grípa til frekari efnahagsaðgerða vegna kórónuveirufaraldursins. Aðgerðirnar fela annars vegar í sér útvíkkun tekjufallsstyrkja fyrir fyrirtæki. Tekjufallsstyrkir eru hugsaðir til að styðja við fyrirtæki sem hafa orðið fyrir verulegu tekjufalli vegna faraldursins frá vori til nóvembermánaðar. Breytingin er sú að fallið er frá skilyrðum um hámarksfjölda starfsmanna og lagt er til að styrkir verði veittir fyrir allt að fimm stöðugildi. Hámarksstyrkur verður 17,5 milljónir á rekstraraðila.
Hins vegar er nýtt úrræði í undirbúningi, viðspyrnustyrkir. Verða þeir veittir í framhaldi af tekjufallsstyrkjum. Úrræðinu er ætlað tryggja að fyrirtæki sem orðið hafa fyrir tekjufalli vegna kórónaveirufaraldursins geti viðhaldið nauðsynlegri lágmarksstarfsemi á meðan áhrifa faraldursins gætir, varðveitt viðskiptasambönd og tryggt viðbúnað þegar úr rætist.
