Fjölmiðlamaðurinn Egill Helgason leggur til að Píratar og Samfylkingin sameinist í einn flokk enda séu stefnur flokkanna orðnar mjög líkar. Þetta kemur fram í stuttum pistli Egils á Facebook. Hann segir að ólíkt öðrum nýjum flokkum hafi Píratar fest sig í sessi og fylgi þeirra sé stöðugt. Hins vegar hafi margt sem flokkurinn boðaði og stóð fyrir reynst tálsýn og stefna hans hafi breyst. Sérstaklega hafi sýnir flokksins á höfundarréttarmál og áhrif samsfélagsmiðla á stjórnmál reynst rangar. Egill segir að þrátt fyrir að flokkurinn lifi góðu lífi hér á landi sé nafn hans orðið úrelt:
„Píratar eru stjórnmálahreyfing sem hefur fest sig í sessi á Íslandi ólíkt flestum nýjum flokkum sem koma og fara. Fylgi þeirra er nokkuð stöðugt. En það er merkilegt að sjá hvernig flokkurinn hefur breyst. Upphaflega eru Píratar angi alþjóðlegrar hreyfingar sem trúði því að internetið myndi gerbreyta stjórnmálum til hins betra með almennri þátttöku og umræðum. Þeir voru líka á móti höfundarrétti, trúðu því að notendum ætti að vera frjálst að deila efni að vild. Hvort tveggja hefur reynst tálsýn. Samskiptamiðlar hafa spillt stjórnmálum. Stórfyrirtæki eins og Spotify arðræna listamenn á netinu. Píratahreyfingin erlendis er næstum dauð. Píratar á Íslandi myndu líklega teljast nokkuð vinstri sinnaður krataflokkur með sterkar áherslur í sjálfsmyndarstjórnmálum. Þar eru þeir býsna nálægt Samfylkingunni og reyndar mætti segja að Píratar dragi Samfylkinguna í þessa átt. Þessir flokkar eru í bandalagi, eiginlega alltaf sammála – og stundum spyr maður hvort þeir gætu ekki sameinast. Nafnið Píratar lifir – en það er í raun orðið svolítið úrelt.“
https://www.facebook.com/egill.helgason.5/posts/10159015585655439