„Það sýnir ágætlega yfirganginn í sértrúarsöfnuðinum sem kallar sig Stjórnarskrárfélagið hvernig hann bregst við því þegar þeir sem sjá um eignir Stjórnarráðsins þrífa
burt krot af veggjum þess. Óprúttinn veggjakrotari hafði málað slagorð um nýja stjórnarskrá á vegg sem hann átti ekki og án leyfis og þegar eigandinn þreif vegginn voru
viðbrögð formanns Stjórnarskrárfélagsins að fordæma þrifin, ekki veggjakrotið!“ segir í Staksteinum Morgunblaðsins í dag og kveður þar við mjög neikvæðan tón í garð þeirrar grasrótarhreyfingar sem berst fyrir því að þær breytingar á stjórnarkrá sem kosið var um árið 2012 öðlist gildi.

Staksteinar væna Ríkisútvarpið einnig um gildishlaðna umfjöllun um málið og segja RÚV vera gengið í Stjórnarskrárfélagið:

„Athygli vakti líka að Ríkisútvarpið birti frétt um málið þar sem ríkisstofnunin kallaði þessi sjálfsögðu viðbrögð þeirra sem hafa umsjón með eignunum „þrifaæði“ í fyrirsögn. Þessi furðulega ríkisstofnun er auðvitað gengin í Stjórnarskrárfélagið og kemur út af fyrir sig ekki á óvart að þessir hópar sameinist, en hversu viðeigandi er það að skattfé sé notað til að afflytja fréttir af þrifum á eigum skattgreiðenda?“

Staksteinar kalla Stjórnarskrárfélagið sértrúarsöfnuð og vísar til myndskeiðs af fundi félagsins þar sem þeir kyrja möntru „um að þeir strjúki stórum ísmola blítt um leið og þeir ganga að honum og leggja hendur yfir hann.“

Staksteinar spyrja hvort eignaspjöll verði varin í nýrri stjórnarskrá í stað eignarréttarins eins og nú er.