Átta manns missa vinnuna við sameiningu Seðlabanka Íslands og Fjármálaeftirlitsins, samkvæmt nýju skipuriti.

Frumvarpið um sameininguna var lagt fram af Katrínu Jakobsdóttur forsætisráðherra, en Seðlabankinn heyrir undir forsætisráðuneytið.

Aðspurð um hvort sameiningin myndi leiða til uppsagna starfsfólks, svaraði Katrín því til í október 2018 að það stæði ekki til :

„Það er alls ekki hugs­un­in á bak við þetta enda erum við að nýta sér­fræðiþekk­ing­una sem best. Við mun­um vinna þetta í nánu sam­ráði við báðar stofn­an­ir og leggj­um mikla áherslu á að vanda okk­ur. Við erum ekki með neitt slíkt mark­mið held­ur erum við fyrst og fremst að hugsa um trausta um­gjörð um pen­inga­stefn­una,“

sagði Katrín við Morgunblaðið, en fyrirsögn fréttarinnar var „Engar uppsagnir fyrirhugaðar.“

Sem fyrr segir missa átta manns vinnuna við sameininguna.

Samkvæmt Morgunblaðinu það Jón Þór Sturluson, sem var aðstoðarforstjóri FME, Sigríður Logadóttir, framkvæmdarstjóri og yfirlögfræðingur, Anna Mjöll Karlsdóttir, yfirlögfræðingur hjá FME og Tómas Örn Kristinsson, framkvæmdastjóri gagnasöfnunar og upplýsingatækni Seðlabankans.

Samkvæmt skipuritinu verða kjarnasvið bankans sjö, þ.e. hagfræði og peningastefna, markaðsviðskipti, fjármálastöðugleiki, bankar, lífeyrir og vátryggingar, markaðir og viðskiptahættir, og lagalegt eftirlit og vettvangsathuganir.

Stoðsvið bankans verða fjögur, þ.e. rekstur, upplýsingatækni og gagnasöfnun, fjárhagur, og mannauður. Jafnframt er í skipuritinu miðlæg skrifstofa bankastjóra. Með nýju skipuriti verða nokkur svið lögð niður eða sameinuð, starfsfólk færist til og átta störf verða lögð niður.