Kostnaður við ríkisstarfsmenn hefur lengi verið mikið í umræðunni. Nú hefur Alþingi birt lista með kostnaði við hvern og einn þingmann. Athygli vekur að kostnaðurinn er mismikill milli þingmanna en rúmar 15 milljónir eru á milli þess sem fékk minnst og þess sem fékk mest.

Það er Helgi Hrafn Gunnarsson sem kostar skattgreiðendur minnst en á síðasta ári fékk hann samtals greiddar 11,8 milljónir. Það er mun minna en það sem aðrir fá en 15 þingmenn fengu yfir 20 milljónir greiddar á síðasta ári.

Þeir sem fengu áberandi meira en aðrir eru þeir Sigmundur Davíð Gunnlaugsson, þingmaður og formaður Miðflokksins, Logi Einarsson, þingmaður og formaður Samfylkingarinnar og Steingrímur J. Sigfússon, þingmaður Vinstri grænna. Sigmundur fékk rúmar 24 milljónir greiddar, Logi fékk rúmar 26 milljónir og Steingrímur fékk mest allra eða rúmar 27 milljónir.

Ef greiðslur til þingmanna eru flokkaðar eftir þingflokkum koma áhugaverðar upplýsingar í ljós. Mikill munur er á meðalkostnaði við hvern þingmann eftir þingflokkum. Þingmenn Flokks fólksins fengu mest greitt að meðaltali eða um 19,5 milljónir. Þá fengu þingmenn Samfylkingarinnar næst mestt eða um 19,4 milljónir. Þingmenn Vinstri grænna og Miðflokksins fengu svipað mikið að meðaltali eða um 18,3 milljónir. Þingmenn Sjálfstæðisflokksins, Viðreisnar og Framsóknarflokksins fengu að meðaltali tæpar 18 milljónir greiddar. Þá fengu þingmenn Pírata áberandi minna greitt en aðrir eða um 16 milljónir að meðaltali.

Samfylkingin –  19.378.903 kr að meðaltali á þingmann

Flokkur fólksins – 19.505.177 kr að meðaltali á þingmann

Vinstri Græn – 18.302.607 kr að meðaltali á þingmann

Miðflokkurinn – 18.266.033 kr að meðaltali á þingmann

Framsóknarflokkurinn – 17.869.825 kr að meðaltali á þingmann

Viðreisn –  17.736.375 kr að meðaltali á þingmann

Sjálfstæðisflokkurinn – 17.525.249 kr að meðaltali á þingmann

Píratar – 16.030.326 kr að meðaltali á þingmann

Hér fyrir neðan má sjá lista yfir hvað hver og einn þingmaður fékk greitt á árinu 2019