Ýmsar vangaveltur hafa blossað upp á samfélagsmiðlum í kjölfar þess að bæjarstjóri Ísafjarðarbæjar, Guðmundur Gunnarsson hætti störfum í dag, samkvæmt samkomulagi við meirihlutann.
Eru þær flestar á þá leið að um pólitískan leik sé að ræða, þar sem Daníel Jakobsson, oddviti Sjálfstæðisflokksins, hafi augastað á bæjarstjórastólnum, en Daníel var ráðinn bæjarstjóri árið 2010 -2014 af meirihluta Framsóknarflokks og Sjálfstæðisflokks.
Daníel var bæjarstjóraefni Sjálfstæðisflokksins í síðustu kosningum, en Framsóknarflokkurinn setti hins vegar það skilyrði eftir myndun meirihluta, að ráðinn yrði ópólitískur bæjarstjóri og varð Guðmundur fyrir valinu. Í kjölfarið réð Daníel sig til fiskeldisfyrirtækis í Noregi, en sneri þaðan aftur fyrir nokkru.
Miðað við viðbrögðin á samfélagsmiðlum var Guðmundur almennt mjög vel liðinn í starfi, en Fréttablaðið greinir frá því að samstarfsörðugleikar hafi verið milli Daníels og Guðmundar, sem eigi sér lengri aðdraganda, þar sem Daníel hafi talið að Guðmundur væri ekki starfinu vaxinn og horfði sjálfur löngunaraugum á starfið. Síðan hafi soðið upp úr á bæjarstjórnarfundi í síðustu viku, í heiftarlegu rifrildi þeirra, með þeim afleiðingum að Guðmundi var gert að hætta.
Daníel Jakobsson vildi lítið tjá sig við Eyjuna um málavöxtu utan þess sem kom fram í yfirlýsingunni í morgun.
Aðspurður hvort eitthvað væri hæft í þeim sögusögnum að hann girntist sjálfur bæjarstjórastólinn sagði hann enga ákvörðun hafa verið tekna um framhaldið:
„Við þurfum að koma okkur í stellingar til að taka ákvörðun um þetta, bærinn er í góðum höndum hjá Þórdísi eins og er og starfsemin heldur áfram, en þetta kemur svo bara í ljós.“
Þá tók hann undir orð Guðmundar, sem sagði í fjölmiðlum í dag að málið hefði átt sér stuttan aðdraganda:
„Ef þú hefðir spurt mig fyrir einni viku síðan hvort þetta gæti verið niðurstaðan, þá er svarið nei.“
Í sama streng tók Marzellíus Sveinbjörnsson, oddviti Framsóknarflokksins, aðspurður um framhaldið. Hann sagði það ekkert hafa verið rætt hver yrði næsti bæjarstjóri.
Hann vísaði síðan á Daníel ef blaðamaður hefði fleiri spurningar.