Björn Bjarnason, fyrrverandi dómsmálaráðherra Sjálfstæðisflokksins, heldur upp á blogg-afmæli sitt í dag, en 25 ár eru liðin frá því að hann hóf pistlaskrif sín á netinu og varð þar með einn af þeim fyrstu sem slíkt gerðu hér á landi.
„Ég þakka lesendum hollustuna í öll þessi ár. Án viðbragða þeirra hefði ánægjan verið minni fyrir höfundinn,“
segir Björn af þessu tilefni í dag, en sjálfur er Björn 76 ára gamall.
Hann byrjaði að skrifa á bjorn.is árið 1995 og bætir við smá tölfræði til upplýsingar:
„Á þessum 25 árum hafa 7.197 dagbókarfærslur birst, að þessari með taldri. Í flokknum ræður og greinar hafa birst 1.085 færslur. Samtalan er 8.282 færslur. Þessar tölur fékk ég hjá Hugsmiðjunni sem hefur hannað og haldið utan um efnið í eplica-kerfi sínu frá árinu 2002, í 18 ár.“
Síðan ef við reynum að reikna út fjölda orða í þeim [færslunum], með því að telja bil og gefa okkur að hvert bil í grein er að skilja milli orða (sem er ekki nákvæm en gefur okkur góða hugmynd um fjöldann), sést að það eru fleiri en 1,8 milljón orð í þeim 8289 [+3 =8282] greinum. En það að reikna út slög, þau eru fleiri en 14,5 milljón! En þetta er bara meginmál greinanna, ekki er tekið tillit til útdrátta eða fyrirsagna.“
Óskar Eyjan Birni til hamingju með áfangann.