Albertína Friðbjörg Elíasdóttir, þingmaður Samfylkingarinnar, var meðal umsækjenda um starf framkvæmdastjóra nýrra landshlutasamtaka fyrir norðan, en hætti síðan við og hefur ákveðið að sitja út kjörtímabilið, að minnsta kosti. Morgunblaðið greinir frá.
Albertína er sögð óákveðin með hvort hún bjóði sig fram til Alþingis að nýju fyrir næsta kjörtímabil, en starfið sem um ræðir verður til með samruna Atvinnuþróunarfélags Eyjafjarðar, Atvinnuþróunarfélags Þingeyinga og Sambands sveitarfélaga í Eyjafirði og Þingeyjasýslum.
„Mér þótti þetta spennandi starf, enda bakgrunnur minn hjá landshlutasamtökunum og áhugavert verkefni fram undan hjá þeim. Það er líka alveg ljóst að starfið á Alþingi útheimtir mikla fjarveru, en heimili mitt er fyrst og fremst fyrir norðan og þar sé ég framtíðina fyrir mér. Því lét ég slag standa og sótti um. Ég fann að ég vildi ljúka kjörtímabilinu og þeim verkefnum sem ég hef verið að sinna þar. Þar hef ég auðvitað líka tækifæri til að vinna fyrir kjördæmið allt nú sem áður og hlakka til þingstarfanna sem eru að hefjast í næstu viku,“
sagði Albertína í gærkvöldi.