Bjarni Benediktsson, fjármálaráðherra er til viðtals í Mannlífi í dag. Þar ræðir hann stuttlega um stjórnarsamstarfið og segir traust ríkja milli hans og Katrínar Jakobsdóttur forsætisráðherra og þau starfi vel saman.
Hann segir þau reyndar nálgast mál með ólíkum hætti og finnur hann að smámunasemi forsætisráðherra:
„Þá á ég til dæmis við að Katrín getur verið smámunasamari en ég hef tileinkað mér og það getur verið mikill kostur en stundum finnst mér það vera galli.“
Þá nefnir Bjarni að meiri tími og vinna færu í að stilla saman strengina á stjórnarheimilinu en hann gerði ráð fyrir, en hann sé almennt ánægður með samstarfið og núverandi flokkasamsetning henti langbest í þeim aðstæðum sem nú séu uppi.
Hann viðurkennir að samstarf við VG hefði ekki komið til greina fyrir nokkrum árum, í kjölfar Landsdómsmálsins, aðildarumsóknininni að Evrópusambandinu og ólíkri sýn í skattamálum. Hinsvegar hefðu þessi hefðbundnu ágreiningsmál verið lögð til hliðar eftir kosningarnar 2016 og 2017.
Bjarni segist ekki vera í miklum samskiptum við Davíð Oddsson, ritstjóra Morgunblaðsins, sem hefur gagnrýnt Sjálfstæðisflokkinn harðlega undanfarin ár meðan hann lofar flest það sem frá Miðflokknum kemur.
Bjarni neitar þó fyrir að það andi köldu þeirra á milli:
„Ég upplifi það ekki þannig. Það eru einfaldlega ekki mikil samskipti eins og staðan er,“
segir Bjarni en tekur fram að hann sé vissulega ósammála mörgu af því sem fram komi í Morgunblaðinu:
„Mér finnst Morgunblaðið heilt yfir almennt vera að tala fyrir til dæmis efnahagsstefnu sem er líkleg til árangurs en mér finnst alveg hafa verið dæmi um áherslur í blaðinu sem ég finn ekki samleið með.“
Þá ítrekar Bjarni að hann hyggist gefa kost á sér áfram sem formaður Sjálfstæðisflokksins á næsta landsfundi.