Alma Hafsteinsdóttir, formaður Samtaka áhugafólks um spilafíkn , skrifar opið bréf til Katrínar Jakobsdóttur forsætisráðherra í dag hvar farið er fram á viðræður við stjórnvöld um hvernig staðið verði að því að opna aftur fyrir notkun spilakassa hér á landi, en spilasölum og spilakössum var lokað þann 16.mars vegna smithættu vegna Covid-19.
Alma segir að samtökin hafi fengið ábendingar frá spilafíklum síðan samkomubannið hófst sem og atvinnurekendum, sem staðhæfi að lokun spilakassanna hafi merkjanleg áhrif:
„Spilafíklar hafa sagt að lokunin sé þeim sem frelsun og atvinnurekendur, sem hafa í sinni vinnu einstaklinga sem eiga við spilafíkn að stríða, segja að lokunin hafi í för með sér bætta líðan, minni fjarveru og fyrir vikið bættan vinnuanda. Þá hafa aðstandendur spilafíkla sagt að innan veggja heimilis hafi lokunin haft mjög jákvæð áhrif og hafa fjármunir verið að skila sér í heimilisrekstur og í grunnþarfir svo sem greiðslur á húsnæði og matarinnkaup.“
Alma nefnir að samtökin vilji auðvitað ekki að opnað verði fyrir notkun þeirra yfirhöfuð, en ef til þess komi, þurfi að huga að ýmsu:
„Að sjálfsögðu væri farsælast að opna hvorki fyrir spilun í einstökum spilakössum eða í spilasölum fyrr en búið er að gera viðeigandi breytingar á aðgengi og takmörkunum hvað varðar upphæðir og tíma sem hægt er að eyða í þessa spilakassa. Mikilvægt er að hafa þann hátt á að spilafíklar verði ekki skildir eftir berskjaldaðir að glíma við fíkn sína, eins og því miður hefur verið síðan árið 1993. Samtökin óska því strax eftir viðræðum við stjórnvöld um hvaða fyrirkomulag megi hafa og hvaða reglum beri að hlíta fari svo að banni á spilakassa verði aflétt. Því fyrr sem þessar viðræður gætu hafist þeim mun betra, en það liggur í augum uppi að þær þurfa að eiga sér stað áður en til umræðu kemur hvort og þá hvenær aflétta eigi banninu.“
Bréfið í heild: