Reynir Traustason, ritstjóri Mannlífs, fjallar um Ríkisútvarpið í leiðara í dag. Segir hann fjölmiðla við dauðans dyr, vegna tilvistar RÚV, sem þó sé rekið með miklu tapi, þrátt fyrir að vera á jötu ríkisins:
„En þar er ástæðan fyrst og fremst óráðsía í rekstri sem þrífst vegna þess að ekki er kallað eftir ábyrgð. Báknið hefur nánast endalaust getað sótt peninga í sjóði almennings.“
Reynir segir ábyrgð Sjálfstæðisflokksins mikla varðandi stöðu RÚV, þó svo hið almenna viðhorf innan flokksins, að minnsta kosti út á við, sé að taka RÚV helst af fjárlögum:
„Sjálfstæðisflokkurinn hefur haldið á lofti því falska flaggi að hann standi með frelsi einstaklingsins og hamli gegn ríkisrekstri. Flokkurinn hefur samt sem áður verið hýsill fyrir Ríkisútvarpið. Flokkurinn hefur verið ráðandi í fyrirbærinu um árabil og gætt þess vandlega að koma sínu fólki að jötunni. Á vakt flokksins hefur stofnunin blásið út í stað þess að vera sett inn í þann ramma sem eðlilegur getur talist. Hræsnin hefur verið nær algjör.“
Reynir setur fram algengt viðhorf fjölmiðlamanna, um að taka beri RÚV af auglýsingamarkaði, en segir að Sjálfstæðisflokkurinn standi í vegi fyrir framgöngu einkaframtaksins í fjölmiðlaheiminum:
„Ef Óli Björn og félagar hans í Sjálfstæðisflokknum ætla að standa í vegi fyrir því að einkaframtakið lifi í fjölmiðlaheiminum verða aðrir að grípa í taumana. Neyðin blasir við. Katrín Jakobsdóttir forsætisráðherra verður að hjálpa menntamálaráðherra sínum við að koma málinu í gegn, með tilstilli stjórnarandstöðunnar ef með þarf. Það þarf víðtæka samstöðu til að tryggja að fjölmiðlun á Íslandi fái þrifist og eigi sér lífsvon. Veiran má ekki verða afsökun fyrir því að gera ekki neitt. Í næstu kosningum kann að verða tímabært að refsa þeim sem veifað hafa röngu flaggi.“