„Dómsmálaráðherra hefur látið hafa eftir sér að mannúð sé höfð að leiðarljósi í málefnum hælisleitenda. Það eru ósannindi. Starfandi stjórnandi Útlendingastofnunar segir að þar sé einungis farið eftir lögum og reglum. Það eru ósannindi,“ segir Njörður.
Njörður bendir á að fólk sem flýr fótgangandi í ofboði frá löndum eins og Afganistan, Írak eða Sýrlandi getur ekki tekið undir sig stökk og lent á Íslandi sem fyrsta landi. „Það fer flest um Tyrkland til Grikklands þar sem sumir fá svokallaða „réttarstöðu flóttamanns“ eða „alþjóðlega vernd“ (sem reynist svo ekki alþjóðleg). Samkvæmt Dyflinnarreglugerð er heimilt að endursenda slíkt fólk, en hvergi segir að það skuli gert,“ segir hann.
„Það er því val Útlendingastofnunar og ber vott um miskunnarleysi, svo að ekki sé talað um mannvonsku. Þegar börn eiga í hlut sem hingað eru komin í leit að friðlandi er það skýlaust brot á barnasáttmála Sameinuðu þjóðanna að senda þau burt í skelfilega örbirgð í Grikklandi, enda segir þar að hagur barns skuli jafnan hafður að leiðarljósi. Slík brottvísun barna er einnig á ábyrgð íslenskra stjórnvalda. Þetta er ljótt til frásagnar.“
Þá segir Njörður börnin vera framtíðarvon okkar allra. „Sá sem rekur saklaust barn frá sér á vergang er ekki góður maður. Enginn er eyland. Við erum órjúfanlegur hluti mannkynsins og berum okkar ábyrgð á lífi þeirra sem til okkar leita í ráðaleysi sínu. Við erum næsta mörg, held ég, sem skömmumst okkar fyrir ómannúðlega starfshætti Útlendingastofnunar og þar með stjórnvalda. Sú var tíð að íslensk stjórnvöld sendu gyðinga í opinn dauða. Þau virðast varla hafa mannast mikið.“