Þingmenn Viðreisnar, Samfylkingar, Pírata, einn þingmaður VG og þingmaður utan flokka lögðu í dag lagt fram tillögu til þingsályktunar á Alþingi um stöðvun brottvísana og endursendingar flóttafólks til Grikklands:

„Við leggjum þessa tillögu fram til að tryggja að stjórnvöld sendi ekki umsækjendur um alþjóðlega vernd á svæði þar sem aðstæður eru óviðunandi og hætt er við að fólk verði fyrir ómannúðlegri eða vanvirðandi meðferð,“

segir í tilkynningu.

Flutningsmenn tillögunnar eru Jón Steindór Valdimarsson, Helga Vala Helgadóttir, Helgi Hrafn Gunnarsson, Andrés Ingi Jónsson, Rósa Björk Brynjólfsdóttir, Hanna Katrín Friðriksson, Þorgerður K. Gunnarsdóttir, Þorsteinn Víglundsson, Logi Einarsson, Guðjón S. Brjánsson, Oddný G. Harðardóttir, Albertína Friðbjörg Elíasdóttir, Guðmundur Andri Thorsson, Ágúst Ólafur Ágústsson, Halldóra Mogensen, Björn Leví Gunnarsson, Jón Þór Ólafsson, Smári McCarthy og Þórhildur Sunna Ævarsdóttir.

Telja flutningsmenn augljóst að aðstæður í Grikklandi gefi fullt tilefni til þess að stöðva allar brottvísanir og endursendingar flóttafólks þangað:

„Unicef, Barnaheill og Rauði Kross Íslands hafa gagnrýnt yfirvöld harðlega fyrir að ætla að senda fjölskyldur til Grikklands þegar ljóst er að aðstæður þar í landi er óboðlegar fyrir fólk hvort sem það er að leita eftir hæli eða hafa hlotið alþjóðlega vernd þar í landi. Þetta sjónarmið er stutt af alþjóðlegum skýrslum og frásögnum þeirra sem hafa starfað fyrir alþjóðleg hjálparsamtök í Grikklandi, líkt og fram kom m.a. í umfjöllun fréttaskýringaþáttarins Kveiks 4. febrúar síðastliðinn. Við eigum að virða mannréttindi allra og því ber okkur skylda til að tryggja að þeir sem leita hér að hæli verði ekki sendir þangað sem hættuástand ríkir. Að mati flutningsmanna er annað hreinlega brot á okkar útlendingalögum þar sem grundvallarreglan er sú að ekki eigi að vísa fólki brott eða endursenda þangað sem líf þess eða frelsi kann að vera í hættu.“