Lægstu grunnlaun ófaglærðs starfsfólks við leikskóla eru 310.000 krónur í dag. Samkvæmt tilboði borgarinnar til Eflingar færu þessi laun upp í 420 þúsund og ofan þau myndu síðan bætast sérstakar álagsgreiðslur sem borgarstjóri segist hafa komið á, yrðu launin þá 460 000. Ófaglærður deildarstjóri á leikskóla er í dag með 417 þúsund en launin færu upp í 520.000 og yrðu 572.000 með álagsgreiðslunum.
Þetta kom fram í viðtali Kastljóss á RÚV við Dag B. Eggertsson borgarstjóra í kvöld. Samningafundi Eflingar og samninganefndar borgarinnar um kjör ófaglærðs starfsfólks lauk í dag án árangurs en borgin hafnaði tilboði sem Efling lagði fram. Efling birti í kjölfarið harðorða tilkynningu þar sem sagt var að slegið hefði verið á útrétta sáttahönd láglaunafólks.
Dagur sagðist í viðtalinu harma stóryrði á borð við þessi. Hann sagði jafnframt um gagnrýni á sig í tengslum við kjaramál ófaglærðra borgarstarfsmanna: „Mér eru gerðar upp skoðanir og svo eru skoðanirnar gagnrýndar og sett spurningamerki við hvort ég standi með þessu fólki en ég hef frá fyrsta degi í embætti gripið til aðgerða til að bæta kjör þessa fólks.“
Dagur sagði jafnframt: „Það er í mörg horn að líta við að stýra borginni en það er ekkert sem er jafnerfitt og kjaradeilur sem þróast út í verkföll. Ef þú hefðir talað við mig fyrir níu mánuðum hefði mér ekki dottið í hug að við værum að sitja hér núna og ræða nákvæmlega þetta.“
Mátti á Degi skilja að hann væri undrandi á því að Efling hefði ekki viljað ganga til samninga á grunni Lífskjarasamninganna sem tryggðu þeim lægst launuðu mestu kaupmáttaraukninguna.