Þórdís Kolbrún Reykfjörð Gylfadóttir, ráðherra og varaformaður Sjálfstæðisflokksins, hélt erindi í Valhöll í gær á fundi Samtaka eldri sjálfstæðismanna.
Styrmir Gunnarsson, fyrrverandi ritstjóri Morgunblaðsins, greinir frá þessu á bloggi sínu og nefnir að Þórdís hafi gert nokkuð sem fáir í flokknum hefðu þorað að nefna:
„Á fundum í Valhöll hefur lítið verið fjallað um stöðu Sjálfstæðisflokksins í skoðanakönnunum, sem benda til þess, að flokkurinn hafi tapað um helmingi hefðbundins fylgis síns frá hruni og berjist nú við að halda sér í 20% fylgi. Þess vegna var síðasti hluti ræðu Þórdísar Kolbrúnar Reykfjörð Gylfadóttur, varaformanns flokksins á fundi Samtaka eldri sjálfstæðismanna í Valhöll í hádeginu í gær eins og ferskur andblær.“
Styrmir nefnir að það sé sjaldgæft að flokksmenn ræði stöðu Sjálfstæðisflokksins og alvarleika þess litla fylgis sem hann mælist með undanfarin misseri. Það hafi því vakið athygli þegar Þórdís tók málið upp:
„Hún benti á, að flokkum hefði fjölgað og fjölmiðlun hefði tekið miklum breytingum en hvoru tveggja taldi hún að einhverju leyti skýra þessa stöðu. En það sem vakti mesta athygli voru þau orð hennar að Sjálfstæðisflokkurinn yrði að vera tilbúinn til að breyta til,“
segir Styrmir.
Styrmir greinir síðan frá því hvað varð til þess að Þórdís áttaði sig á stöðu flokksins:
„Hún hafði verið á ferð í Kaliforníu og kynnzt þar þeim miklu breytingum, sem eru að verða í veröld kvikmyndanna vegna tilkomu Netflix. Hin hefðbundnu kvikmyndafyrirtæki ættu ekki annan kost en að mæta þeirri samkeppni með breytingum. Þá varð henni hugsað til „flokksins okkar“ hér heima. Og ljóst að ráðherrann hafði áttað sig á að það sama gæti átt við um stjórnmálaflokka við breyttar aðstæður,“
segir Styrmir og greinir frá því sem Þórdís lagði til að sjálfstæðismenn gerðu:
„Við þurfum að vera manneskjulegri, þegar við tölum“, sagði ráðherrann og bætti því við að þannig mundi Sjálfstæðisflokkurinn ná til fleiri kjósenda. Og sagði svo: „Við getum ekki keyrt áfram“ með sama hætti og verið hefur,“
segir Styrmir og heldur áfram:
„Það eru þessi viðhorf sem vekja vonir um breytta tíma í Valhöll.“