„Ef þetta er eitt­hvað vanda­mál þá munum við að sjálf­sögðu skoða það. En ég held það sé það ekki, við höfum ekki brotið á neinum sjó­mönnum þarna.“

Þetta segir Björgólfur Jóhannsson, starfandi forstjóri Samherja við Fréttablaðið í dag, vegna hótana McHenry Vena­ani, leiðtoga stjórnarandstöðuflokksins PDM í Namibíu, um að gripið verði til aðgerða gegn Samherja þar í landi, ef Samherji hyggst hætta starfsemi í landinu án þess að greiða rúmlega 1000 sjómönnum sem sagt var upp í kjölfar verkfalls þeirra árið 2015.

Fær Samherji 15 daga frest til að bregðast við, samkvæmt New Era vefmiðilsins í Namibíu.

Ætlar ekki að bregðast við

Björgólfur segir við Fréttablaðið að kröfurnar séu ekki á rökum reistar, þar sem enginn sjómaður hafi misst vinnuna:

„Þetta er bara hluti af heildar­málinu og verður skoðað í því sam­hengi, en við förum ekki að bregðast við þessu sér­stak­lega. Við höfum frekar horft til þess að þeir séu á betri launum en gengur og gerist,“

Segir Björgólfur og neitar því að fyrirtækið hafi brotið á sjómönnunum.

Krafan snýr að greiðslu einna mánaðarlauna, auk lífeyrisgreiðslna, ellegar verði þess krafist að eignir Samherja í Namibíu verði kyrrsettar.

Sjá einnig: Samherji sakaður um vafasöm viðskipti – Sagður græða milljarða á siðlausri viðskiptafléttu

Sjá einnig: Samherji lærir af reynslunni og þróar nýtt kerfi til varnar spillingu og peningaþvætti – Hættir starfsemi í Namibíu