Ríkisstjórnin samþykkti á fundi sínum í morgun að ráðast í endurskoðun á lögum um ráðherraábyrgð annars vegar og lögum um Landsdóm hins vegar. Tillagan var lögð fram af Katrínu Jakobsdóttur forsætisráðherra og Áslaugu Örnu Sigurbjörnsdóttur dómsmálaráðherra, samkvæmt tilkynningu forsætisráðuneytinu og dómsmálaráðuneytinu.

„Á undanförnum áratugum hafa lög um ráðherraábyrgð og Landsdóm sætt gagnrýni hér á landi í ljósi réttarþróunar í sakamálaréttarfari. Slíka gagnrýni er til að mynda að finna í skýrslu um starfsskilyrði stjórnvalda frá 1999, skýrslu um eftirlit Alþingis með framkvæmdarvaldinu frá 2009 og í skýrslu þingmannanefndar til að fjalla um skýrslu rannsóknarnefndar Alþingis frá 2010. Árið 2010 ályktaði Alþingi að slík endurskoðun skyldi fara fram á vegum Alþingis en ekki varð af þeirri endurskoðun. Í þeirri vinnu sem nú stendur yfir um breytingar á stjórnarskrá á vettvangi formanna stjórnmálaflokka hefur málefnið verið rætt og ljóst að rík þörf er á endurskoðun laganna,“

segir jafnframt í tilkynningu.

Lögin hafa margoft verið rædd á Alþingi, ekki síst eftir að Geir H. Haarde var ákærður af Alþingi í kjölfar hrunsins, en það er eina skiptið sem reynt hefur á þau.

Endurskoðun laganna mun meðal annars taka til skýrleika refsiákvæða um embættisbrot, aðdraganda ákæru, svo sem frumkvæði að rannsókn á embættisfærslum, umgjörð máls og hlutverk þingnefnda í því sambandi, og skipan Landsdóms. Forsætisráðherra mun í samráði við dómsmálaráðherra fela sérfræðingi að leiða vinnuna og standa vonir til þess að henni verði lokið á haustmánuðum.