Heimsókn Mike Pence, varaforseta Bandaríkjanna, til Íslands í gær, hefur vakið athygli erlendra miðla. Bandaríski vefmiðillinn Huffington Post, sem er með um 50 milljón lesendur daglega, greinir frá því í dag að Mike Pence hafi fengið litríka ögrun á leið sinni til fundar við forseta Íslands í Höfða:

„Mike Pence Got Colorfully Taunted On His Way To Meet Iceland’s President“

The Guardian í Bretlandi segir regnbogafánana hafa verið til marks um andstöðu Pence við LGBT samfélagið:

„Pride flags greet Mike Pence in Iceland in nod to anti-LGBT record“

Vísað er til þess að Advania og reyndar fleiri fyrirtæki og stofnanir á svæðinu, flögguðu regnbogafánanum, fána hinsegin fólks í gær, en höfuðstöðvar Advania eru beint á móti Höfða og var því fáninn sýnilegur öllum þeim sem þar voru og hefur Pence vafalaust tekið eftir honum, en hann hefur verið umdeildur vegna íhaldssamra skoðana sinna gagnvart hinsegin fólki.

Vitnað er í forstjóra Advania, Ægi Má Þórisson, sem sagðist hafa fundið þörf til að fagna fjölbreytileikanum á þessum degi og vildi sýna það með því að flagga.

Einnig er minnst á að forsetafrúin, Eliza Reid, hafi verið með regnbogaarmband, líkt og þegar hún hitti Vladimír Pútín Rússlandsforseta á dögunum.