Ég fór að velta fyrir mér þessu fallega merki – á maður að kalla þetta hólk eða stöng? – sem ég sá utan á rakarastofu sem opnaði ekki alls fyrir löngu á Skólavörðustíg.
Við vitum líklega flest hvað þetta þýðir – merkið er alþjóðlegt og segir okkur að þarna sé rakarastofa. Þetta má sjá um víða veröld. En líklega taka fæstir sérstaklega eftir því.
Ég les að í þessu séu ævagömul tákn. Á miðöldum klipptu rakarar ekki bara hár. Þeir drógu líka tennur úr fólki og tóku úr því blóð, framkvæmdu jafvel skurðaðgerðir. Voru á sinn hátt einhvers konar læknaígildi – á tímum sem voru ekki ýkja heilsusamlegir.
Þannig mun rauði liturinn í merkinu tákna blóð og svo er sagt að sá hvíti geti táknað sárabindi. Sá blái mun hins vegar vera síðar tilkominn.